ក្រុមបាល់ទាត់ជម្រើសជាតិជប៉ុន និងកូរ៉េខាងត្បូងបានធ្លាក់ចេញពីពានរង្វាន់ FIFA World Cup 2022 នៅត្រឹមវគ្គ១៦ក្រុមចុងក្រោយយប់មិញនេះហើយ ។
ជប៉ុន បានបរាជ័យក្រោមថ្វីជើងក្រុមក្រូអាត បន្ទាប់ពីលេង១២០នាទីស្មើគ្នា ១-១ ហើយដល់វគ្គប៉េណាល់ទីចាញ់ ៣-១។ ដោយកីឡាកររបស់ក្រុមជប៉ុន ប៉េណាល់ទីមិនចូលដល់ទៅ៣នាក់ឯណោះដែលជារឿងមិនគួរឱ្យជឿនោះទេ។ ស្របពេលខាងក្រុមកូរ៉េខាងត្បូងវិញទក់សាច់ក្រោមថ្វីជើងរបស់ក្រុមប្រេស៊ីល ដោយចាញ់ក្នុងលទ្ធផល ៤-១ ឯណោះ។ ដោយនេះសបញ្ជាក់ឱ្យឃើញថាក្រុមខ្លាំងទាំងនៅអាស៊ី សុទ្ធតែត្រូវហាលអាវដូចគ្នានៅត្រឹមវគ្គ១៦ក្រុមចុងក្រោយនេះ។
រំលឹកថាក្រុមតំណាងទ្វីបអាស៊ីទាំង៣ដែលឡើងពីវគ្គចែកពូលមក សុទ្ធតែធ្លាក់នៅត្រឹមវគ្គ១៦ក្រុមទាំងអស់។ ដោយអូស្ត្រាលីលេងចាញ់អាហ្សង់ទីន ជប៉ុនលេងចាញ់ក្រូអាត និងកូរ៉េខាងត្បូងលេងចាញ់ប្រេស៊ីល៕