អ្នកប្រដាល់កម្ពុជា លន បញ្ញា បានធ្វើឱ្យកក្រើកសង្វៀន Mas Fight នៅប្រទេសថៃ ក្រោយពីផ្ដួលកីឡាករថៃឱ្យសន្លប់ នឹងទទួលបានប្រាក់រង្វាន់រហូតដល់១សែនបាតផងដែរ។
តែក្រោយពីចប់ការប្រកួតទៅ កីឡាករកម្ពុជាខាងលើហួសចិត្តខ្លាំងរហូតដល់បង្ហោះលើបណ្ដាញសង្គម និងបានចោទថាខាង Mas Fight មិនគោរពតាមសន្យាឡើយ ពោលគឺរូបគេមិនទទួលបាន១សែនបាតទេ តែបាន១ម៉ឺនបាតទៅវិញ។ កត្ដានេះហើយ ទើបធ្វើឱ្យ បញ្ញា ហួសចិត្ត រកអីនិយាយមិនចង់ចេញនោះទេ។
លន បញ្ញា បាននិយាយថា៖ “ម្រាបសួរបងប្អូន ថ្ងៃនេះ មានរឿងចង់និយាយបន្តិច។ មិញនេះ ខ្ញុំបានប្រកួតឈ្នះកីឡាករថៃ នៅលើសង្វៀន Mas Fight ១ទឹក៩នាទី។ មុនដំបូងគេ (ភាគីថៃ) ថា ប្រាក់រង្វាន់១សែនបាត បើវ៉ៃឱ្យសន្លប់ ហើយពេលយើងវ៉ៃឱ្យសន្លប់ ឃើញស្លាករង្វាន់ ដែលគេប្រគល់ឱ្យខ្ញុំ គឺ១សែនបាតមែន ប៉ុន្តែពេលបើកលុយឱ្យពិតប្រាកដ គឺ១ម៉ឺនបាតទេបងប្អូន គឺស្មើនឹង១៣០០០០០រៀលហ្នឹង បាក់ទឹកចិត្តស្តូក”៕