មិនប្រាកដថាកីឡាករសកម្មខ្លាំង រត់ច្រើនលើទីលាន សុទ្ធតែជោគជ័យ អាចបង្កើតផ្លែផ្កាក្នុងការប្រកួតនោះទេ ព្រោះពេលខ្លះជ័យជម្នះ គឺទាមទារទេពកោសល្យ ភាពឈ្លាសវៃ និងការចេះរៀបចំតាក់តិច ឬយុទ្ធសាស្ត្រផ្អែកតាមគូប្រជែងនីមួយៗដែលយើងត្រូវជួប។
ដូច Lionel Messi បច្ចុប្បន្នជាកីឡាកររកបាន ៣ គ្រាប់ខ្ពស់បំផុតលំដាប់ទីពីរ បន្ទាប់ពី Mbappe នៅ World Cup សារនេះ រួចជម្រើសជាតិអាហ្សង់ទីនក៏បានឡើងទៅដល់វគ្គ ៨ ក្រុមចុងក្រោយហើយដែរ។ តែយ៉ាងណាបើទៅមើលស្ថិតិគួរឲ្យចាប់អារម្មណ៍មួយ បែរជាឃើញថា Messi រមែងដើរច្រើនរាប់សិបពាន់ម៉ែត្រក្នុងការប្រកួតទៅវិញ។
តាមការវាយតម្លៃពី BBC យើងធ្វើការបង្ហាញបញ្ជីឈ្មោះកីឡាករដើរច្រើនបំផុតក្នុងការប្រកួតទាំង ១០ លើក ហើយមានឈ្មោះ Messi ដល់ទៅ ៣ លើកឯណោះ។ យ៉ាងណាបន្ទាប់ការរៀបរាប់ CTS Sports ក៏នឹងលើកបង្ហាញហេតុផលដែលបុរសវ័យ ៣៥ ឆ្នាំ រមែងតែងដើរនៅលើទីលាន៖
១០) កីឡាករស្វីស Ricardo Rodriguez ដើរចម្ងាយ ៤ ៦២១ ម៉ែត្រ នៅប្រកួតទល់ស៊ែប៊ី
៩) កីឡាករអាហ្សង់ទីន Lionel Messi ដើរចម្ងាយ ៤ ៦២៧ ម៉ែត្រ នៅប្រកួតទល់អារ៉ាប៊ីសាអ៊ូឌីត
៨) កីឡាករអាហ្សង់ទីន Cristian Romero ដើរចម្ងាយ ៤ ៦៦៩ ម៉ែត្រ នៅប្រកួតទល់ប៉ូឡូញ
៧) កីឡាករអារ៉ាប៊ីសាអូឌីត Mohamed Kanno ដើរចម្ងាយ ៤ ៧០០ ម៉ែត្រ នៅប្រកួតទល់ប៉ូឡូញ
៦) កីឡាករស៊ែប៊ី Aleksandar Mitrovic ដើរចម្ងាយ ៤ ៧១៦ ម៉ែត្រ នៅប្រកួតទល់ស្វីស
៥) កីឡាករអាហ្សង់ទីន Lionel Messi ដើរចម្ងាយ ៤ ៧៣៦ ម៉ែត្រ នៅប្រកួតទល់ប៉ូឡូញ
៤) កីឡាករប៉ូឡូញ Robert Lewandowski ដើរចម្ងាយ ៤ ៨២៩ ម៉ែត្រ នៅប្រកួតទល់អាហ្សង់ទីន
៣) កីឡាករហ្គាណា Mohammed Salisu ដើរចម្ងាយ ៤ ៨៣៣ ម៉ែត្រ នៅប្រកួតទល់អ៊ុយរុយហ្គាយ
២) កីឡាករអាហ្សង់ទីន Lionel Messi ដើរចម្ងាយ ៤ ៩៩៨ ម៉ែត្រ នៅប្រកួតទល់ម៉ិកស៊ីកូ
១) កីឡាករប៉ូឡូញ Robert Lewandowski ដើរចម្ងាយ ៥ ២០២ ម៉ែត្រ នៅប្រកួតទល់អារ៉ាប៊ីសាអ៊ូឌីត
មិនច្បាស់ពីរបៀបលេងនៃកីឡាករដទៃ ថាហេតុអ្វីបានដើរច្រើនជាងរត់ តែបើសម្រាប់ Lionel Messi ត្រូវបានអ្នកចាត់ការលោក Pep Guardiola បង្ហើបកាលពីប៉ុន្មានឆ្នាំមុន ថាវាគឺជាយុទ្ធសាស្ត្រសន្សំកម្លាំង ក៏ដូចជាសិក្សាពីចន្លោះប្រហោងរបស់គូប្រជែង ពោលមិនមានជាភាពខ្ជិល ឬការធុញទ្រាន់នឹងការប្រកួតអ្វីនោះទេ។
គ្រូបង្វឹក ធ្លាប់ដឹកនាំ Messi លើកពាន UCL ២ សម័យកាលនៅ Barcelona បានលើកឡើងយ៉ាងដូច្នោះថា៖ “ឃើញគេដើរ តែខួរក្បាលគេនៅតែផ្សារភ្ជាប់ទៅសកម្មភាពលើទីលាន ចាំសង្កេតមើលក្បាលរបស់គេ ងាកឆ្វេង ងាកស្តាំ គេសិក្សាមើលពីចន្លោះប្រហោងរបស់ជញ្ជាំងការពារក្រោមទាំង ៤ ហើយចាំមើលចុះក្រោយ ៥ ឬ ១០ នាទី ពេលគេគូរបានផែនការណ៍ជាក់លាក់ណាមួយ គេក៏នឹងដឹងច្បាស់ ថាត្រូវបន្លាស់ទីទៅទីតាំងណា ដើម្បីមានឱកាសវាយសម្រុកច្រើន”។
គួរឲ្យដឹងដែរថា នៅ World Cup ទាំង ៥ សម័យកាលដែល Messi បានឈរជើង សរុបរកបាន ៩ គ្រាប់ហើយ នាំមុខ ១ គ្រាប់លើ Cristiano Ronaldo និងកំពុងស្មើគ្រាប់បាល់នឹង Kylian Mbappe។ យ៉ាងណាបើធៀបនឹងកីឡាករមានគ្រាប់បាល់ច្រើនបំផុត គឺអតីតកីឡាករអាល្លឺម៉ង់ Miroslav Klose នៅចាញ់ដល់ ៧ គ្រាប់ឯណោះ។ នេះគឺជា World Cup លើកចុងក្រោយរបស់កីឡាករអាហ្សង់ទីន ហើយបន្តទៅវគ្គ ១/៤ ផ្តាច់ព្រ័ត្រ ពួកគេត្រូវប៉ះហូឡង់ នៅថ្ងៃទី ០៩ ធ្នូ៕
ប្រភព៖ បរទេស