លោក Tite គ្រូបង្វឹករបស់ក្រុមប្រេស៊ីល បានអះអាងថាខ្សែប្រយុទ្ធ Neymar បានចូលហាត់វិញហើយ និងអាចទំនងជាចូលលេងបានថែមទៀតក្នុងការប្រកួតទល់កូរ៉េខាងត្បូងនៅរាត្រីនេះ។
ខ្សែប្រយុទ្ធវ័យ៣០ឆ្នាំបានខកខានការប្រកួត២ប្រកួតមកហើយ ដោយសារតែរបួសកជើងខាងស្ដាំតាំងពីលេងប្រកួតទី១ក្នុងពូលជាមួយក្រុមសែបមកម្ល៉េះ។ យ៉ាងណាមិញ ក្រោយពីព្យាបាលយ៉ាងយកចិត្តទុកដាក់មក នៅពេលនេះ Neymar បានចូលហាត់តិចៗវិញហើយជាមួយក្រុម ហើយគ្រូបង្វឹកក៏បានអះអាងថែមទៀតថាអាចនឹងប្រសើរឡើង ក៏ដូចជាគេអាចចូលក្រុមបានវិញឆាប់ៗផងដែរ។
លោក Tite បាននិយាយថា៖ “Neymar នឹងហាត់ជាមួយក្រុម ហើយប្រសិនបើដំណើរការបានល្អ គាត់អាចលេងនៅរាត្រីនេះបានហើយ”។ ខ្សែប្រយុទ្ធលេងនៅក្លឹប PSG រូបនេះបានរងរបួសញឹកញាប់មែនទែនជាមួយជើងខាងស្ដាំរបស់គេនៅប៉ុន្មានឆ្នាំចុងក្រោយនេះ។ ខណៈដែលវាក៏បានធ្វើឱ្យ Neymar ខកខានប្រកួតសំខាន់ៗជាច្រើនផងដែរទាំងនៅជម្រើសជាតិ និងក្លឹបអាជីព៕