កាលពីយប់មិញនេះ Sterling មិនមានវត្ដមានលេងឱ្យក្រុមអង់គ្លេសនោះទេ ដោយគេត្រូវបានអនុញ្ញាតិឱ្យត្រលប់ទៅអង់គ្លេសដើម្បីមើលថែប្រពន្ធកូន គ្រាដែលមានចោរបានចូលផ្ទះលួចរបស់របរ។
ប្រភពនៅអង់គ្លេសបានអះអាងថាមានក្រុមចោរមួយក្រុមបានចូលទៅលួចរបស់របរនៅក្នុងផ្ទះរបស់ Sterling ខណៈដែលដៃគូរបស់គេនិងកូនក៏ស្ថិតនៅក្នុងផ្ទះនោះដែរ។ មិនមានការបញ្ជាក់ពីរបួសដែលបង្កឡើងដោយក្រុមចោរលើក្រុមគ្រួសារ Sterling នោះទេ ប៉ុន្តែរូបគេបានស្នើសុំគ្រូបង្វឹកអង់គ្លេសត្រលប់ទៅផ្ទះវិញភ្លាមៗដើម្បីមើលថែគ្រួសារក្រោយពីកើតមានរឿងមិនល្អនេះ។
លោក Gareth Southgate បានយល់ព្រមឱ្យខ្សែប្រយុទ្ធខាងលើត្រលប់ទៅផ្ទះវិញ ហើយក៏មិនបញ្ជាក់ពីពេលត្រលប់មកកាតាវិញដែរ។ ប្រសិនបើមិនមានអ្វីធ្ងន់ធ្ងរទេ គេអាចមកវិញក្នុងពេលឆាប់ៗនេះ តែបើតម្រូវឱ្យនៅស្នាក់នៅមើលថែប្រពន្ធកូន គេក៏អាចមិនមកវិញជួយអង់គ្លេសបន្ដបានដែរ៕