ខ្សែប្រយុទ្ធ Kylian Mbappe បានបង្កើតកំណត់ត្រាមួយទៅហើយ ដោយក្លាយជាកីឡាកររកគ្រាប់បាល់នៅព្រឹត្តិការណ៍ FIFA World Cup បានច្រើនជាង Cristiano Ronaldo និង Diego Maradona ទៅទៀត។
Mbappe រកបាន២គ្រាប់ម្នាក់ឯងក្នុងការប្រកួតទល់ក្រុមប៉ូឡូញ ដែលបារាំងបានយកឈ្នះក្នុងលទ្ធផល ៣-១។ បន្ថែម២គ្រាប់នេះទៀត ធ្វើឱ្យរូបគេរកបានដល់ទៅ៥គ្រាប់ហើយនៅ World Cup 2022 នេះត្រឹមវគ្គ១៦ក្រុមចុងក្រោយ។ ហើយបើបូកទាំង៤គ្រាប់ដែលគេធ្វើបាននៅ World Cup 2018 ទៀតនោះ Mbappe រកបាននៅ World Cup ចំនួន៩គ្រាប់ទៅហើយ។ នេះជាចំនួនច្រើនជាង Ronaldo និង Maradona ធ្វើបានទៅទៀត ព្រោះខ្សែប្រយុទ្ធ២នាក់នេះនៅ World Cup រកបានត្រឹម៨គ្រាប់ប៉ុណ្ណោះ។
កីឡាករវ័យ២៣ឆ្នាំ កំពុងធ្វើបានល្អមែនទែន ដោយរកគ្រាប់បាល់ជួយក្រុមបារាំងបានច្រើន។ ចំនួន៩គ្រាប់នេះគឺស្មើជាមួយ Lionel Messi របស់ក្រុមអាហ្សង់ទីនដែរ ខណៈដែលគេក្មេងជាងដល់ទៅ១២ឆ្នាំ ឬនៅសល់ការប្រកួត World Cup ជាច្រើនលើកទៀត។ Mbappe នៅជម្រើសជាតិបារាំង សរុបគ្រាប់បាល់គ្រប់ការប្រកួត រកបាន៣៣គ្រាប់ទៅហើយក្នុងការលេង៦៣ប្រកួតមកនេះ៕