កីឡាករ Phil Foden បានហៅមិត្តរួមក្រុម Jude Bellingham ថាជាកីឡាករឆ្នើមម្នាក់ និងថ្ងៃអនាគតរូបគេនឹងក្លាយជាខ្សែបម្រើល្អបំផុតម្នាក់នៅលើលោកនេះជាក់ជាមិនខាន។
កាលពីយប់មិញនេះ ក្រុមជម្រើសជាតិអង់គ្លេសបានយកឈ្នះលើក្រុមសេណេហ្គាល់បានដល់ទៅ ៣-០ ឯណោះ។ ដោយក្នុងការប្រកួតនោះដែរ កីឡាករដែលគេមើលឃើញថារស់រវើក និងចែកបាល់ដាច់បានល្អជាងគេនោះគឺ Bellingham ខាងលើនេះហើយ។ ខ្សែបម្រើវ័យក្មេងរូបនេះ តែងទទួលបានទំនុកចិត្តជានិច្ចពីលោក Gareth Southgate ក្នុងការចូលលេង ហើយក៏មិនដែលធ្វើឱ្យអ្នកគាំទ្រខកបំណងផងដែរ។
សូម្បីតែមិត្តរួមក្រុម Foden ក៏បាននិយាយដែរថា៖ “ខ្ញុំមិនចង់លើកគាត់ពេកទេ ព្រោះគាត់នៅក្មេង ប៉ុន្តែគាត់ជាកាដូដ៏មានតម្លៃណាស់សម្រាប់ក្រុមអង់គ្លេសដែលខ្ញុំធ្លាប់ឃើញ។ គាត់គ្មានចំណុចខ្សោយទេក្នុងការប្រកួត។ ខ្ញុំគិតថាគាត់នឹងក្លាយជាខ្សែបម្រើល្អបំផុតម្នាក់នៅលើលោកនេះ”។
អង់គ្លេសក្រោយពីយកឈ្នះក្រុមសេណេហ្គាល់បានហើយ ពួកគេនឹងបន្ដទៅប៉ះក្រុមបារាំងទៀតនៅវគ្គ៨ក្រុមចុងក្រោយ។ ដោយនោះទើបជាការប្រកួតស្វិតស្វាញពិតប្រាកដសម្រាប់អង់គ្លេស ព្រោះថាបារាំងជាក្រុមការពារតំណែងជើងឯក ហើយទម្រង់លេងរបស់ពួកគេក៏ល្អខ្លាំងណាស់ដែរ៕