ហេតុអ្វី​សមាគម​បាល់ទាត់​អាហ្សង់ទីន បង្ហោះ​រូបភាព Messi កាន់​ទង់ជាតិ​បង់ក្លាដេស?

ដ្បិត​ត្រូវ​បាន​អារ៉ាប៊ីសាអ៊ូឌីត ​បញ្ចប់​កំណត់ត្រា​មិន​ស្គាល់​ពាក្យ​ថា “ចាញ់” នៅ​ប្រកួត​ទី ៣៧ ក៏​អាហ្សង់ទីន​នៅ​តែ​អាច​បត់​ជោគវាសនា​ត្រលប់​មក​ភាព​ល្អ​ប្រសើរ​វិញ​បាន តាម​រយៈ​ការ​ឈ្នះ ២ ប្រកួត​បន្តបន្ទាប់ យក​បាន ៦ ពិន្ទុ ឡើង​មក​វគ្គ ១៦ ក្រុម ​ហើយ​កំណត់​ប៉ះ​អូស្ត្រាលី នៅ​រាត្រី​នេះ។

យ៉ាង​ណា​មាន​អ្នក​គាំទ្រ​ជា​ច្រើន​បាន​ចោទ​សួរ​មក​កាន់ CTS Sports ដោយ​ឆ្ងល់​ថា ហេតុអ្វី​នៅ​ប្រកួត​ថ្ងៃ​មុន ដែល Lionel Messi បញ្ចប់​ទី​គ្រាប់​បាល់​ទល់​ម៉ិកស៊ីកូ នៅ​នាទី ៦៤ បែរ​ជា​ត្រូវ​បាន​សមាគម​បាល់ទាត់​អាហ្សង់ទីន យក​រូបភាព​អបអរ​នោះ ទៅ​កាត់​ត​ដាក់​ទង់ជាតិ​បង់ក្លាដេស ហើយ​បង្ហោះ​លើ​គណនី​ផ្លូវការ​ទៅ​វិញ។ តើ​កីឡាករ​វ័យ ៣៥ ឆ្នាំ មាន​ជាប់​ពាក់ព័ន្ធ​អ្វី នឹង​ប្រទេស​នៅ​ប៉ែក​អាស៊ី​ខាង​ត្បូង​មួយ​នេះ ធ្លាប់​ជាប់​សាច់​ឈាម ឬ​ក៏​មាន​ទំនាក់ទំនង​នឹង​គ្នា​បែប​ណា​ដែរ?

ចម្លើយ​យ៉ាង​ខ្លី​គឺ ​អាហ្សង់ទីន​ចង់​ផ្ញើ​ជ័យជម្នះ​នេះ ទៅ​កាន់​អ្នក​គាំទ្រ​ជាតិសាសន៍​ទី​ពីរ​របស់​ពួក​គេ ដោយ​ក្រៅ​តែ​ពី​ប្រជាជន​អាហ្សង់ទីន​ផ្ទាល់ បង់ក្លាដេស​គឺ​ជា​ជាតិសាសន៍​បណ្ដុំ ទៅ​ដោយ​អ្នក​គាំទ្រ​ជម្រើស​ជាតិ​ពួក​គេ​ច្រើន​បំផុត​ក្នុង​លោក។

នេះ​ជា​ការ​ទទួល​ស្គាល់​ប្រៀប​ដូច​ជា​វប្បធម៌​មួយ​ក្នុង​ពិភព​បាល់ទាត់ តាំង​ពី​ជំនាន់ Diego Maradona ល្បីល្បាញ​ខ្លាំង​ក្នុង​កំឡុង​ទសវត្ស​ឆ្នាំ ១៩៨០ មក​ម្ល៉េះ គេ​តែង​ចំណាំ​និយាយ​ត​គ្នា​ថា បង់ក្លាដេស​គឺ​ជា​អ្នក​គាំទ្រ​ជាតិសាសន៍​ទី​ពីរ​របស់​អាហ្សង់ទីន ហើយ​ប្រជាជន​ឥណ្ឌា​ គឺ​ជា​អ្នក​គាំទ្រ​របស់​ប្រេស៊ីល។

នៅ​រូបភាព​មួយ​សន្លឹក​នោះ បង្ហោះ​ចេញ​ដោយ​គណនី​ផ្លូវការ សមាគម​បាល់ទាត់​អាហ្សង់ទីន ហៅ​កាត់ AFA ដែល​បាន​កាត់​បញ្ចូល​ទង់ជាតិ​បង់ក្លាដេស ​ប្រៀប​ដូច​ជា Messi បាន​លើក​អបអរ​នៅ​ការ​រក​គ្រាប់​បាល់ ក្នុង​ព្រឹត្តិការណ៍ FIFA World Cup។ បើ​ទោះ​បី​វា​មិន​មែន​ជា​រូបភាព​ពិត ត្រឹម​ជា​រូបភាព​កែច្នៃ តែ​ប្រជាជន​បង់ក្លាដេស​ក៏​នៅ​តែ​មាន​ក្តី​រំភើប អំណរ​អរគុណ​ជា​ពន់ពេក ដែល​អាហ្សង់ទីន​បាន​ចូលរួម​ចំណែក​ជួយ​លើក​មុខមាត់​ប្រទេស​របស់​ពួក​គេ​ទៅ​លើ​ឆាក​អន្តរជាតិ តាម​រយៈ​វិស័យ​បាល់ទាត់។

ដោយឡែក​ផ្អែក​តាម​ការ​ចែកចាយ​លើ​ទំព័រ FIFA ក៏​បាន​បង្ហាញ​ពី​សកម្មភាព​សាទរ​ដូច​ទឹក​បាក់​ទំនប់ នៃ​ប្រជាជន​បង់ក្លាដេស​ដែល​កំពុង​ទស្សនា​ជួបជុំ​គ្នា​រាប់​ពាន់​នាក់ ស្រែកហ៊ោរ សាទរ រត់​ឡើង​​ឆាក​អបអរ​គ្រាប់​បាល់​របស់ Lionel Messi។

បញ្ជាក់​ឲ្យ​ដឹង​ដែរ​ថា នេះ​មិនមែន​ជា​ការ​គាំទ្រ​ធម្មតាៗ​នោះ​ទេ ជា​រួម​គឺ​ប្រៀប​ដូច​ជា​វប្បធម៌ ​ទទួល​ស្គាល់​ពី​ប្រទេស​សងខាង ហើយ​រៀងរាល់ ៤ ឆ្នាំ​ម្តង ប្រជាជន​បង់ក្លាដេស បាន​ត្រៀម​លក្ខណៈ រៀបចំ​សាទរ​តាម​ដង​វិថី ក៏​ដូច​ជា​ហេដ្ឋារចនាសម្ព័ន្ធ​នានា តុបតែង​ជា​ទម្រង់​ទង់ជាតិ និង​មុខមាត់​តារា​ឆ្នើម​អាហ្សង់ទីន​ទៀត​ផង។

មតិ​ពី​ប្រជាជន​បង់ក្លាដេស​មួយ​រូប ធ្លាប់​បាន​លើក​ឡើង​ប្រាប់​សារព័ត៌មាន​យ៉ាង​ដូច្នោះ​ថា៖ “បង់ក្លាដេស​ជា​ប្រទេស​ដែល​ស្រលាញ់​បាល់ទាត់​បំផុត តែ​យើង​ពុំ​មាន​លទ្ធភាព​បង្កើត​បាន​ជា​ក្រុម​ល្អ​មួយ ម្ល៉េះ​យើង​សូម​ផ្ញើ​ក្តី​ស្រលាញ់​ដ៏​ធំធេង​នេះ តាម​រយៈ​ការ​អបអរ​សាទរ គាំទ្រ​ជាមួយ​ជម្រើស​ជាតិ​អាហ្សង់ទីន​ផង”។

គួរ​ឲ្យ​ដឹង​ដែរ​ថា Messi ក៏​ធ្លាប់​ធ្វើ​ដំណើរ​មក​ដល់​ប្រទេស​នៅ​ទ្វីប​អាស៊ី​មួយ​នេះ​ផង​ដែរ កាល​ឆ្នាំ ២០១១ គ្រា​នោះ​តំណាង​ឲ្យ​ជម្រើស​ជាតិ​អាហ្សង់ទីន ប្រកួត​មិត្តភាព​ទល់​នីហ្សេរីយ៉ា នៅ​រដ្ឋ Dhaka ប្រទេស​បង់ក្លាដេស។ តម្លៃ​សំបុត្រ​ទស្សនា​សារ​នោះ ​ទាប​បំផុត​គឺ​ជាង ៦០ ដុល្លារ ជា​ហេតុ​នាំ​ឲ្យ​ប្រជាជន​បង់ក្លាដេស​តិចតួច​ណាស់ មាន​លទ្ធភាព​អាច​ទៅ​ចូលរួម​ទស្សនា ព្រោះ​អី​កម្រិត​ជីវភាព​ពួក​គេ​នៅ​ជាង ១០ ឆ្នាំ​មុន គឺ​ពិបាក​ខ្លាំង រាប់​បាន​ជា​ប្រទេស​ដ៏​ក្រីក្រ​បំផុត​មួយ​ក្នុង​សកលលោក៕

ប្រភព៖ បរទេស

ភ្ជាប់ទំនាក់ទំនងជាមួយ CTS SPORT