ការប្រកួតលីគកំពូលកម្ពុជា នឹងរកឃើញជើងឯកនៅល្ងាចនេះហើយ ដែលជាប្រកួតចុងក្រោយក្នុងរដូវកាលឆ្នាំ២០២២នេះតែម្ដង។
ក្រុមភ្នំពេញក្រោនដែលកំពុងឈរនៅកំពូលតារាងនឹងស្វាគមន៍ក្រុមភ្ញៀវបឹងកេត។ ស្របពេលក្រុមព្រះខ័នរាជស្វាយរៀងវិញនឹងបើកកីឡដ្ឋានរបស់ខ្លួនស្វាគមន៍ក្រុមភ្ញៀវវិសាខា។ ការប្រកួតទាំងពីរនេះ លេងនៅម៉ោង៦:៣០នាទីល្ងាចដូចគ្នា។ វាជាជំនួបកាត់សេចក្ដីរកក្រុមជើងឯកតែម្ដង ព្រោះព្រះខ័នរាជស្វាយរៀង ភ្នំពេញក្រោន និងវិសាខា សុទ្ធតែមានពិន្ទុ៤៩ពិន្ទុស្មើគ្នាទាំងអស់។ ប្រសិនបើនៅរាត្រីនេះ ក្រុមណាភ្លាត់ ឬភ្នំពេញក្រោនមិនអាចឈ្នះបឹងកេតបានទេ នោះជើងឯកទំនងជារបូតពីដៃរបស់ពួកគេហើយ។
សូមបញ្ជាក់ដែរថាត្បិតតែរាត្រីនេះជាការប្រកួតដែលនឹងរកឃើញជើងឯកមែន ប៉ុន្តែពិធីបំពាក់មេដាយមាស ឬប្រគល់ពាននឹងធ្វើឡើងនៅថ្ងៃស្អែកឯណោះ នៅកីឡដ្ឋានក្រុមដែលនឹងឈ្នះជើងឯកវិញ។ ការធ្វើបែបនេះក៏ព្រោះតែបច្ចុប្បន្ន ក្រុមកំពូលតារាងទាំង៣ មានពិន្ទុស្មើគ្នា ដូច្នេះត្រូវរង់ចាំមើលលទ្ធផលការប្រកួតសប្តាហ៍ចុងក្រោយ ទើបអាចដឹងថាក្រុមមួយណាជាម្ចាស់ជើងឯក៕