លោក Hugo Sanchez វីរបុរសរបស់មិចសិកូ បានអះអាងថាក្រុមអេស្ប៉ាញមានបំណងដើម្បីចង់ចាញ់ក្រុមជប៉ុនតែម្ដង ដើម្បីធ្វើយ៉ាងណាគេចឱ្យផុតក្រុមប្រេស៊ីលនៅវគ្គបន្ទាប់។
អតីតកីឡាករធ្លាប់លេងនៅក្លឹប Real Madrid និងលេងឱ្យជម្រើសជាតិមិចសិកូ៣ដងនៅព្រឹត្តិការណ៍ World Cup បានមើលការប្រកួតរបស់អេស្ប៉ាញ ទល់នឹងជប៉ុន។ ដោយលោកបានអះអាងថាអេស្ប៉ាញហាក់មានបំណងចង់បានលេខ២ក្នុងពូលតែម្ដង។ ការទទួលបានចំណាត់ថ្នាក់លេខ២នេះ នឹងធ្វើឱ្យក្រុមអេស្ប៉ាញគេចផុតពីប្រេស៊ីលផងដែរនៅពេលដែលឡើងដល់វគ្គ៨ក្រុមចុងក្រោយ។
Hugo Sanchez និយាយថា៖ “ខ្ញុំមិនបាននៅក្នុងចិត្តរបស់ Luis Enrique ទេ ប៉ុន្តែគាត់ប្រាកដជាគិតហើយថាអ្វីជាវិធីល្អដើម្បីគេចលេងទល់ក្រុមប្រេស៊ីលនៅវគ្គ៨ក្រុមចុងក្រោយ។ វាមិនមែនមានន័យថាពួកគេខ្លាចប្រេស៊ីលនោះទេ ប៉ុន្តែពួកគេគោរពដល់ក្រុមប្រេស៊ីលទៅវិញ។ គ្រូបង្វឹកមិនដែលនិយាយពាក្យទាំងនេះនោះទេ”៕