ខ្សែប្រយុទ្ធ Edinson Cavani បានរុញអេក្រង់ VAR ឱ្យដួលអំឡុងពេលរូបគេនិងមិត្តរួមក្រុមដើរចូលក្នុងបន្ទប់ផ្លាស់សំលៀកបំពាក់ ក្រោយពីដឹកនាំខ្លួនមិនអាចឡើងទៅវគ្គ១៦ក្រុមចុងក្រោយបាន។
អ៊ុយរុយហ្គាយ បានយកឈ្នះលើក្រុមហ្គាណា ២-០ មែន ប៉ុន្តែពូកគេមិនអាចឡើងទៅជុំបន្ដបានទេ ព្រោះថាក្រុមកូរ៉េខាងត្បូងបានយកឈ្នះលើក្រុមព័រទុយហ្គាល់ក្នុងលទ្ធផល ២-១ ដែរ។ ក្រោយពីដឹងថាក្រុមខ្លួនមិនអាចឡើងទៅជុំបន្ដបានហើយ ក្រុមកីឡាករអ៊ុយរុយហ្គាយមិនសប្បាយចិត្តជាខ្លាំងចំពោះការកាត់សេចក្ដីក្នុងការប្រកួតរបស់ពួកគេ។
ជាក់ស្ដែងសមាជិកក្រុមកីឡាករអ៊ុយរុយហ្គាយបានបន្ទោសទៅអាជ្ញាកណ្ដាលនិងតវ៉ាជាខ្លាំង ចំពោះការមិនផ្ដល់បាល់ប៉េណាល់ទីនៅពេលកីឡាករហ្គាណាបង្កកំហុសលើពួកគេ។ ប្រសិនបើទទួលបានបាល់ប៉េណាល់ទីបន្ថែមទៀត នោះអ៊ុយរុយហ្គាយនឹងបានឡើងវគ្គបន្ដហើយ។ ជាមួយគ្នានោះដែរ កីឡាករ Cavani ក៏បានបង្ហាញការមិនពេញចិត្តជាខ្លាំងផងដែរ។ ដោយរូបគេបានរុញអេក្រង់ VAR ដែលដាក់តាំងទុកឱ្យអាជ្ញាកណ្ដាលពិនិត្យដួលផ្ងារជើងថែមទៀតផង៕