ក្រុមបាល់ទាត់ជម្រើសជាតិកូរ៉េខាងត្បូងបានឡើងទៅវគ្គ១៦ក្រុមចុងក្រោយ FIFA World Cup 2022 ហើយ បន្ទាប់ពីពួកគេបានយកឈ្នះលើក្រុមព័រទុយហ្គាល់បានក្នុងលទ្ធផល ២-១ នៅយប់មិញនេះ។
កូរ៉េ បើកឆាកស្មើជាមួយអ៊ុយរុយហ្គាយ ហើយបន្ដចាញ់ហ្គាណាថែមទៀត។ តែប្រកួតចុងក្រោយ ពួកគេធ្វើបានល្អវិញ ដោយយកឈ្នះលើក្រុមខ្លាំងព័រទុយហ្គាល់បានក្នុងលទ្ធផល ២-១។ ជាមួយការបន្ថែមបាន៣ពិន្ទុនេះទៀត បានធ្វើឱ្យកូរ៉េខាងត្បូងឡើងលេខ២ក្នុងពូលហើយ ក្រោយមានពិន្ទុស្មើអ៊ុយរុយហ្គាយដែរ។ តែអ្វីធ្វើឱ្យកូរ៉េខាងត្បូងឡើងទៅជុំបន្ដបាននោះ គឺក្រុមអាស៊ីមួយនេះរកគ្រាប់បាល់បានច្រើនជាងក្រុមអ៊ុយរុយហ្គាយ ពោលគឺកូរ៉េរកបានដល់ទៅ៤គ្រាប់ឯណោះ ស្របពេលអ៊ុយរុយហ្គាយវិញមានត្រឹម២គ្រាប់ទេ។
ការឡើងទៅវគ្គ១៦ក្រុមចុងក្រោយនោះដែរ ក្រុមកូរ៉េខាងត្បូងនឹងត្រូវប៉ះជាមួយក្រុមខ្លាំងប្រេស៊ីលហើយ។ កូរ៉េជាក្រុមទី៣នៅអាស៊ីដែលអាចឆ្លងផុតវគ្គចែកពូលបានក្នុងពានរង្វាន់ FIFA World Cup 2022 នេះ៕