ខ្សែប្រយុទ្ធ Cristiano Ronaldo កំពុងស្ថិតនៅ៥០-៥០ ក្នុងការបានចូលលេងនាជំនួបទល់ក្រុមកូរ៉េខាងត្បូងនៅរាត្រីនេះ ដែលជាជំនួបបិទពូល H ។
ប្រធានក្រុមវ័យ៣៧ឆ្នាំខាងលើមិនបានចូលហាត់ជាមួយសមាជិកក្រុមនោះទេ ដោយសារតែមានបញ្ហាតិចតួច។ ដូច្នេះការប្រកួតទល់ក្រុមកូរ៉េខាងត្បូងក៏គេទំនងជាមិនអាចចូលលេងបានដែរ។ តែយ៉ាងណា នេះនៅមិនទាន់អាចសន្និដ្ឋាន១០០%នោះទេ ព្រោះគ្រូបង្វឹករបស់ក្រុមព័រទុយហ្គាល់បានអះអាងថាវាស្ថិតនៅ ៥០-៥០ ប៉ុណ្ណោះថាតើគេអាចលេងបានឬអត់។
លោក Fernando Santos បាននិយាយថា៖ “យើងចាំមើលទាំងអស់គ្នា ព្រោះវានៅ៥០-៥០ ថាតើគាត់អាចលេងឬអត់។ វាអាស្រ័យលើគាត់ និងតាមស្ថានភាពរបស់គាត់ដែលយើងបានឃើញជាក់ស្ដែង។ យើងក៏បានត្រៀមរួចរាល់ហើយដែរ ប្រសិនបើគាត់មិនបានលេង។ យើងក៏ចង់ឱ្យកីឡាករសម្រាកខ្លះដែរ ព្រោះការលេងជាប់គ្នាពេក អាចនឹងប្រឈមការរបួសមិនខាន”។
រំលឹកថាព័រទុយហ្គាល់បានកៅអីវគ្គ១៦ក្រុមរួចទៅហើយបន្ទាប់ពីពួកគេបានយកឈ្នះលើក្រុមហ្គាណា និងអ៊ុយរុយហ្គាយ នៅ២ប្រកួតដំបូងមក។ ការប៉ះកូរ៉េខាងត្បូងនេះ ព័រទុយហ្គាល់ទាមទារត្រឹមស្មើក៏អាចឡើងទៅជុំបន្ដ ជាមួយលទ្ធផលកំពូលតារាងផងដែរ៕