លោក Louis van Gaal អ្នកចាត់ការទូទៅរបស់ប្រទេសហូឡង់បានវាយបកយ៉ាងចាស់ដៃទៅលើអ្នកសារព័ត៌មានដែលថា មើលក្រុមគាត់លេង World Cup នៅកាតា គួរឱ្យធុញ។
ក្រុមរបស់លោក Van Gaal បានឡើងទៅវគ្គបន្ទាប់នៃការប្រកួត បន្ទាប់ពីបញ្ចប់ក្នុងចំណាត់ថ្នាក់លេខមួយនៃពូល A ដោយតាមពីក្រោយដោយក្រុមលេខពីរសេណេហ្គាល់។
Van Gaal បានឆ្លើយតបយ៉ាងចាស់ដៃទៅលើអ្នកសារព័ត៌មានជុំវិញទម្រង់លេងរបស់ប្រទេសហូឡង់ ហើយប្រាប់គាត់ឱ្យត្រឡប់ទៅផ្ទះវិញ ប្រសិនបើគាត់គិតថាក្រុមហូឡង់លេងបាល់គួរឱ្យធុញ។
ឆ្លើយតបទៅនឹងអ្នកសារព័ត៌មាន អ្នកចាត់ការសញ្ជាតិហូឡង់រូបនេះបាននិយាយថា៖
“ខ្ញុំគិតថា អ្នកមានទស្សនៈវិស័យបាល់ទាត់ខុសពីខ្ញុំ។ ហេតុអ្វីបានជាអ្នកមិនសរសេរវាថា អ្នកគិតថាវាគួរឱ្យធុញណាស់?
បើអ្នកគិតថាវាគួរឱ្យធុញ ម៉េចមិនត្រឡប់ទៅផ្ទះវិញ?
មែនហើយ ខ្ញុំគិតថាខកចិត្ត ប៉ុន្តែខ្ញុំមិនយល់ស្របជាមួយអ្នកទេ ខ្ញុំគិតថាអ្នកគ្រប់គ្នាពិតជាមានមោទកភាពណាស់ដែលយើងកំពុងឈានទៅវគ្គបន្ទាប់ ហើយខ្ញុំគិតថាមនុស្សដឹងពីមូលហេតុដែលអ្នកសួរសំណួរទាំងនេះ។
ខ្ញុំមិនគិតថាវាអាក្រក់ដូចអ្នកនិយាយទេ” ៕
ប្រភព៖ Sportbible