លោក Renard គ្រូបង្វឹករបស់ក្រុមអារ៉ាប់ប៊ីសាអូឌីត បានអះអាងថានៅរាត្រីនេះគឺជាឱកាសសម្រាប់ជម្រើសជាតិក្នុងការបង្កើតប្រវត្តិសាស្ត្រថ្មីរបស់ពួកគេក្នុងព្រឹត្តិការណ៍ FIFA World Cup 2022 ហើយ។
ក្រុមអារ៉ាប់ប៊ីសាអូឌីត នឹងប៉ះជាមួយក្រុមជម្រើសជាតិមិចសិកូនៅរាត្រីនេះ ដើម្បីស្វែងរក៣ពិន្ទុបន្ថែមទៀត ទទួលបានកៅអីឡើងទៅវគ្គ១៦ក្រុមចុងក្រោយ។ ក្រុមដឹកនាំដោយលោក Renard មួយនេះបានបង្កភាពភ្ញាក់ផ្អើលម្ដងមកហើយ កាលប៉ះក្រុមអាហ្សង់ទីនដោយយកឈ្នះក្នុងលទ្ធផល ២-១ តែគួរឱ្យសោកស្ដាយទៅលេងចាញ់ប៉ូឡូញទៅវិញ ធ្វើឱ្យបាត់ឱកាសកក់កៅអីវគ្គ១៦ក្រុមចុងក្រោយ។ តែនៅរាត្រីនេះ ពួកគេទទួលបានឱកាសជាថ្មីម្ដងទៀត បើឈ្នះមិចសិកូបាន នោះអារ៉ាប់ប៊ីសាអូឌីតនឹងបានឡើងវគ្គ១៦ក្រុមចុងក្រោយហើយ។
មុនការប្រកួតមកដល់ លោក Renard បានប្រាប់ទៅកីឡាករថា៖ “យើងស្ថិតក្នុងជំនាន់ដ៏ល្អមួយ។ លើកទី១ដែលក្រុមបានឡើងដល់វគ្គ១៦ក្រុមគឺនៅឆ្នាំ១៩៩៤ ដូច្នេះប្រសិនបើយើងចង់ឱ្យគេចង់ចាំ គេសរសេរឈ្មោះក្នុងប្រវត្តិសាស្ត្រ ឬយើងចង់ឱ្យគេបំភ្លេចនៅត្រឹមនេះ។ នៅរាត្រីនេះ ជាឱកាសរបស់យើងហើយ”៕