លោក Czeslaw Michniewicz គ្រូបង្វឹករបស់ក្រុមប៉ូឡូញ បានអះអាងថានៅរាត្រីនេះក្រុមរបស់លោកនឹងត្រូវប្រើកីឡាករច្រើនជាង១ម្នាក់ដើម្បីតាមបិទ Lionel Messi ឱ្យជាប់។
ប៉ូឡូញប្រកួតជាមួយក្រុមអាហ្សង់ទីននេះ ហាក់មិនបារម្ភខ្លាំងពេកនោះទេ ព្រោះពួកគេទាមទារត្រឹមស្មើក៏អាចឡើងទៅវគ្គបន្ដបានដែរ។ ប៉ុន្ដែខាងក្រុមអាហ្សង់ទីនវិញ ទាមទារឈ្នះដាច់ខាតហើយ ដើម្បីធានាបានកៅអីវគ្គ១៦ក្រុមចុងក្រោយ។ តែទោះជាយ៉ាងនេះក្ដី សម្រាប់គ្រូបង្វឹកក្រុមប៉ូឡូញក៏បានត្រៀមយុទ្ធសាស្ត្រដើម្បីតាមបិទខ្សែប្រយុទ្ធឆ្នើម Lionel Messi ឱ្យជាប់នៅរាត្រីនេះផងដែរ។
លោក Czeslaw Michniewicz បាននិយាយថា៖ “គ្រប់ក្រុមតែងតែរកវិធីដើម្បីបិទ Messi ហើយខ្ញុំគិតថាយើងមិនទាន់អាចរកក្បូនបាននៅឡើយទេ។ មានប្រកួតច្រើនដែលគាត់រកគ្រាប់បាល់បាន ប៉ុន្តែគាត់ក៏បញ្ជាក់ថានេះជា World Cup ចុងក្រោយរបស់គាត់ដែរ ហើយមួយទៀតគាត់ក៏នឹងប្រឹងអស់ពីពោះដើម្បីព្រឹត្តិការណ៍ចុងក្រោយនេះ។ អ្នកត្រូវការកីឡាករច្រើនជាងម្នាក់ ដើម្បីបញ្ឈប់គាត់ ហើយពេលអ្នកលេងទល់អាហ្សង់ទីន អ្នកក៏ត្រូវត្រៀមខ្លួនក្រោយពីរបូតគ្រាប់បាល់ផងដែរ”៕