លោក Gregg Berhalter បាននិយាយសុំទោសទៅខាងអ៊ីរ៉ង់ បន្ទាប់ពីមានកំហុសអចេតនាកើតឡើង ដោយសារតែសហព័ន្ធបាល់ទាត់អាមេរិកបង្ហោះរូបខាងអ៊ីរ៉ង់ខុសទង់ជាតិ។
រឿងកើតឡើងដោយសារតែសហព័ន្ធកីឡាបាល់ទាត់អាមេរិក បានបង្ហោះការប្រកួតរវាងក្រុមអាមេរិក និងអ៊ីរ៉ង់នៅលើបណ្ដាញសង្គម ប៉ុន្តែពួកគេបានប្រើរូបទង់ជាតិរបស់អ៊ីរ៉ង់ខុស ដោយមិនមាននិមិត្តសញ្ញា Islamic របស់អ៊ីរ៉ង់នោះទេ។ ក្រោយពីឃើញមានគេថាខុសច្រើន ពួកគេក៏បានលុបបង្ហោះនោះចោលភ្លាមៗផងដែរ។
ចំពោះករណីនេះ លោក Gregg Berhalter គ្រូបង្វឹកអាមេរិក ដែលនឹងត្រូវដឹកនាំក្រុមប៉ះអ៊ីរ៉ង់នៅរាត្រីនេះក្នុងព្រឹត្តិការណ៍ World Cup បាននិយាយសុំទោសដែរថា៖ “ខ្ញុំនិយាយម្ដងទៀតថាកីឡាករនិងក្រុមគ្រូបង្វឹកគឺមិនប៉ះពាល់ដល់រឿងនេះទេ។ វាហួសពីការគ្រប់គ្រងរបស់ពួកយើង។ តែយ៉ាងណា អ្វីដែលយើងអាចធ្វើបាននៅពេលនេះគឺសុំទោសទៅកីឡាករ និងគ្រូបង្វឹកអ៊ីរ៉ង់ផងដែរ។
សូមបញ្ជាក់ថាក្រុមអាមេរិក នឹងប៉ះក្រុមអ៊ីរ៉ង់នៅម៉ោង២រំលងអាធ្រាត្រនេះក្នុងការប្រកួត FIFA World Cup ក្នុងពូលចុងក្រោយ។ ជំនួបនេះ អាមេរិក ត្រូវការឈ្នះដាច់ខាត ដើម្បីបានឡើងទៅវគ្គ១៦ក្រុមចុងក្រោយបាន៕