លោក Tite គ្រូបង្វឹកក្រុមជម្រើសជាតិប្រេស៊ីល បានស្នើដល់អាជ្ញាកណ្ដាលឱ្យជួយមើលថែ និងការពារកីឡាករប្រេស៊ីលផង ក្រោយពី Neymar ត្រូវបានកីឡាករសែបបង្កកំហុសរបួសធ្ងន់។
Neymar បានរងរបួសកែងជើង ហើមខ្លាំង មិនអាចលេង២ប្រកួតចុងក្រោយក្នុងពូលឱ្យក្រុមប្រេស៊ីលបាននោះទេ។ របួសនេះកើតឡើង បន្ទាប់ពីកីឡាកររបស់សែបបានបង្កកំហុសលើរូបគេ រហូតដល់ត្រូវប្ដូរចេញតែម្ដង។ ជំនួបប្រកួតទី១នោះដែរ ក្រុមកីឡាកររបស់សែប បានបង្កកំហុសច្រើនមែនទែនទៅលើក្រុមប្រេស៊ីល។
មុនការប្រកួតទី២ចាប់ផ្ដើមនៅរាត្រីនេះទល់ក្រុមស្វីស លោក Tite គ្រូបង្វឹកប្រេស៊ីល បានបង្ហាញចំណាប់អារម្មណ៍ដែរថា៖ “ប្រសិនបើអ្នកចង់អបអរកីឡាបាល់ទាត់ អ្នកក៏ត្រូវតែផ្ដោតទៅលើការបង្កកំហុសដែរ។ ក្រុមម្ខាងទៀត ហាក់ផ្ដោតទៅលើកីឡាករម្នាក់ៗដើម្បីឱ្យមាននរណារបួស។ រឿងនេះគួរតែឈប់ហើយ។ អាជ្ញាកណ្ដាលត្រូវផ្ដោតលើបញ្ហានេះឱ្យបានមែនទែន”៕