លោក Luis Enrique បានអះអាងថាក្រុមអេស្ប៉ាញ នឹងមិនទុកជើងអ្វីឡើយក្នុងការប្រកួតទល់ក្រុមជប៉ុន នាជំនួបចុងក្រោយក្នុងពូលខាងមុខនេះ។
ក្រុមអេស្ប៉ាញទើបមាន៤ពិន្ទុប៉ុណ្ណោះក្រោយពីលេងស្មើក្រុមអាល្លឺម៉ង់ ១-១ នៅយប់មិញនេះ។ ក្នុងពូលនេះដែរ ក្រុមមួយនេះនៅមិនទាន់បានកក់កៅអីទៅវគ្គ១៦ក្រុមចុងក្រោយនៅឡើយទេ ប៉ុន្តែពួកគេក៏ត្រជាក់ចិត្តបន្ដិចដែរ ព្រោះ៤ពិន្ទុនេះមានទាំងការឈ្នះក្រុមកូស្ដារីកាដល់ទៅ ៧-០ ថែមទៀត ដែលជាការប្រកួតចំណេញគ្រាប់បាល់ច្រើនមែនទែនសម្រាប់ពួកគេ។
តែយ៉ាងណាក៏ដោយ លោក Enrique បាននិយាយនៅយប់មិញហើយថាប្រកួតចុងក្រោយជាមួយក្រុមជប៉ុន ក្រុមរបស់លោកមិនបន្ធូរជើងនោះទេ បើទោះជាលទ្ធផលត្រឹមស្មើក៏ក្រុមរបស់លោកមានឱកាសឡើងទៅវគ្គបន្ដក៏ដោយ។ អតីតអ្នកចាត់ការក្រុម Barcelona បានបញ្ជាក់ច្បាស់ថា៖ “យើងនឹងដាក់ពេញជើង ដើម្បីចូលប្រកួតនិងយកជ័យជម្នះឈរកំពូលតារាងនៃពូលនេះ”៕