លោក Moriyasu គ្រូបង្វឹកក្រុមជម្រើសជាតិជប៉ុន បានអះអាងថាក្រុមរបស់ខ្លួនចង់បង្កើតក្បួនលេងបាល់ទាត់ដោយខ្លួនឯង ក្រោយពីបានរៀនសូត្រច្រើនពីប្រទេសដទៃតាមរយៈកីឡាករចេញទៅប្រកបអាជីព។
ជប៉ុន បានបង្កភាពភ្ញាក់ផ្អើលខ្លាំង ក្រោយពីពួកគេអាចយកឈ្នះលើក្រុមអាល្លឺម៉ង់បានក្នុងលទ្ធផល ២-១។ ជើងខ្លាំងនៅអាស៊ីមួយនេះ មានកីឡាកររហូតដល់ទៅ៨នាក់ឯណោះដែលលេងនៅលីគអាល្លឺម៉ង់ ដូច្នេះហើយពួកគេយល់ច្បាស់ពីបាល់ទាត់អឺរ៉ុប ជាពិសេសការលេងនៅអាល្លឺម៉ង់តែម្ដង។ ជាក់ស្ដែង អ្នកដែលរកបាន២គ្រាប់ឱ្យជប៉ុនលើអាល្លឺម៉ង់នោះគឺ Ritsu Doan លេងនៅFreiburg និង Takuma Asano លេងនៅ VfL Bochum ។
ជាមួយកីឡាករលេងនៅក្រៅស្រុកច្រើននេះដែរ លោក Moriyasu គ្រូបង្វឹកជប៉ុនបាននិយាយថា៖ “ជប៉ុន ចង់កសាងក្បូនលេងដោយខ្លួនឯង ដោយរៀនសូត្របានបណ្ដាប្រទេសដទៃ។ យើងមានកីឡាករ៨នាក់លេងនៅលីគអាល្លឺម៉ង់ យើងបានរៀនសូត្រពីបាល់អាល្លឺម៉ង់បានច្រើន។ ពួកគេបានជួយជប៉ុនឱ្យរីកចម្រើនលើវិស័យបាល់ទាត់នេះកាន់តែច្រើន”។
រំលឹកថានៅល្ងាចនេះ ជប៉ុនដែលស្ថិតក្នុងពូល E នឹងត្រូវប្រកួតជាមួយក្រុមកូស្ដារីកាហើយ។ ប្រសិនបើពួកគេអាចឈ្នះប្រកួតនេះបានទៀត នោះជប៉ុន នឹងមានឱកាសឡើងទៅវគ្គ១៦ក្រុមចុងក្រោយជាក់ជាមិនខាន៕