លោក Herve Renard កោតសរសើរកូនក្រុមរបស់ខ្លួន បើទោះជាប្រកួតទី២នៅ World Cup 2022 នេះ ពួកគេលេងចាញ់ក្រុមប៉ូឡូញក្នុងលទ្ធផល ២-០ ក៏ដោយ។
ប្រកួតដំបូងយកឈ្នះក្រុមអាហ្សង់ទីន ២-១ ហើយប្រកួតបន្ទាប់នៅយប់មិញនេះ ក្រុមអារ៉ាប់ប៊ីសាអូឌីត បានបង្ហាញទម្រង់ល្អថែមទៀត បើទោះជាពួកគេមិនអាចទទួលបានលទ្ធផលឈ្នះក្រុមប៉ូឡូញក៏ដោយ។ ចាញ់ ២-០ មែន ប៉ុន្តែអ្នកគាំទ្រអារ៉ាប់ប៊ីសាអូឌីត ពិតជាពេញចិត្តជាមួយការហ៊ានលេងរបស់សមាជិកក្នុងក្រុម ដែលសុទ្ធសឹងតែកីឡាករក្នុងស្រុកបែបនេះដែរ។
ក្រោយចប់ការប្រកួត លោក Herve Renard គ្រូបង្វឹកពោពេញដោយបទពិសោធរូបនេះបានចេញមុខនិយាយសរសើរកូនក្រុមថា៖ “គ្មាននរណាម្នាក់នៅលើលោកគិតថាយើងអាចលេងបានល្អដល់កម្រិតនេះទេ។ នៅអារ៉ាប់បី យើងបានស្គាល់កីឡាករទាំងអស់នេះ ប៉ុន្តែពួកគេមិនត្រូវបានគេស្គាល់ឡើយនៅក្រៅប្រទេស។ យើងនៅអាចមានសង្ឃឹមឡើងវគ្គបន្ដ។ ខ្ញុំមោទកភាពចំពោះកីឡាកររបស់ខ្ញុំ។ យើងគួរតែអាចគ្រប់គ្រងការប្រកួតឱ្យបានល្អជាងនេះ។ ប្រសិនបើយើងអាចប៉េណាល់ទីចូល នោះនៅតង់ទី១ នោះលទ្ធផលនឹងបញ្ចប់ទៅស្មើ ១-១ ហើយការប្រកួតក៏អាចនឹងប្រែប្រួលផងដែរ”៕