ខ្សែប្រយុទ្ធ Saleh Al Shehri របស់ក្រុមអារ៉ាប់ប៊ីសាអូឌីត បានអះអាងថាដំណឹងដែលចុះផ្សាយថាក្រុមកីឡាករទទួលបានរង្វាន់ឡាន Saleh Al Shehri ក្រោយពីឈ្នះអាហ្សង់ទីននោះ មិនមែនជារឿងពិតនោះទេ។
ក្រុមអារ៉ាប់ប៊ីសាអូឌីត បានវាយបកយកឈ្នះលើក្រុមអាហ្សង់ទីន ២-១ ក្នុងការប្រកួតបើកឆាក FIFA World Cup 2022 កន្លងទៅនេះ។ ជ័យជម្នះយ៉ាងធំធេងនេះ បានធ្វើឱ្យពលរដ្ឋរបស់ប្រទេសនេះសប្បាយចិត្តខ្លាំងមែនទែន។ ខណៈដែលព្រះអង្គម្ចាស់ Mohammed bin Salman ក៏បានដាក់ឱ្យពលរដ្ឋក្នុងប្រទេសសម្រាក១ថ្ងៃពេញដើម្បីអបអរជ័យជម្នះនេះដែរ។ ប្រភពនៅអឺរ៉ុបថែមទាំងអះអាងទៀតថា ព្រះអង្គម្ចាស់នឹងផ្ដល់ឡាន Rolls-Royce តម្លៃកន្លះលានដុល្លារឱ្យទៅកីឡាករម្នាក់១គ្រឿងថែមទៀតនៅពេលត្រលប់ឬបញ្ចប់ភារកិច្ចនៅ World Cup 2022 នេះ។
តែបើតាមខ្សែប្រយុទ្ធ Saleh Al Shehri របស់ក្រុមអារ៉ាប់ប៊ីសាអូឌីតវិញ បញ្ជាក់ច្បាស់ហើយថារឿងនោះមិនមែនជារឿងពិតនោះទេ។ ពួកគេមិនទាន់ទទួលដំណឹងផ្លូវការណាមួយឡើយ ហើយរឿងបានឡាននោះក៏មិនមែនជារឿងពិតដែរ។ កីឡាករ អារ៉ាប់ប៊ីសាអូឌីត ផ្ដោតលើការលេងតំណាងឱ្យជាតិ មិនមែនចង់បានរង្វាន់អ្វីឡើយ។
រំលឹកថា អារ៉ាប់ប៊ីសាអូឌីត នឹងប៉ះក្រុមប៉ូឡូញនៅរាត្រីនេះ ដើម្បីស្វែងរក៣ពិន្ទុបន្ថែមទៀតក្នុងការប្រកួតទី២។ ប្រសិនបើក្រុមនេះអាចឈ្នះ១ប្រកួតនេះទៀត នោះពួកគេនឹងបានឡើងទៅវគ្គ១៦ក្រុមចុងក្រោយហើយ៕