ខ្សែប្រយុទ្ធ Lautaro Martinez របស់ក្រុមអាហ្សង់ទីន បានអះអាងថាការប្រកួតជាមួយក្រុមមិចសិកូនៅរាត្រីនេះ ដូចការប្រកួតវគ្គផ្ដាច់ព្រ័ត្រអីចឹង ព្រោះទាមទារឈ្នះជាដាច់ខាត។
ការប្រកួតទី១កន្លងទៅ ក្រុមអាហ្សង់ទីនបានចាញ់ក្រុមអារ៉ាប់ប៊ីសាអូឌីតក្នុងលទ្ធផល ២-១ ទៅហើយ ដូច្នេះប្រកួតទី២នៅរាត្រីនេះ ក្រុមរបស់លោក Scaloni ត្រូវការឈ្នះជាដាច់ខាត។ ប្រសិនបើលទ្ធផលស្មើ ឬចាញ់ នោះក្រុមអាហ្សង់ទីននឹងប្រឈមខ្លាំងក្នុងការធ្លាក់ត្រឹមវគ្គចែកពូលមិនខាន។ ដូច្នេះហើយទើបគ្រូបង្វឹកអាហ្សង់ទីន ចាត់ទុកប្រកួតនៅយប់នេះដូចជាប្រកួតវគ្គផ្ដាច់ព្រ័ត្រដែរ។
Lautaro Martinez ដែលជាខ្សែប្រយុទ្ធជួរមុខរបស់អាហ្សង់ទីន បាននិយាយថា៖ “វាដូចការប្រកួតផ្ដាច់ព្រ័ត្រសម្រាប់យើង ព្រោះវានឹងក្លាយជាការប្រកួតកាត់សេចក្ដីថាយើងអាចបន្ដទៅមុខ ឬចប់ត្រឹមនេះ។ វាមានសម្ពាធច្រើនសម្រាប់យើង ក្រោយចាញ់ប្រកួតទី១ ប៉ុន្តែយើងជាក្រុមអាហ្សង់ទីនដែលតែងតែរួបរួមគ្នា និងផ្ដោតលើការប្រកួតជានិច្ច។ យើងត្រូវការឈ្នះជាចាំបាច់សម្រាប់ការប្រកួតមួយនេះ”៕