លោក Gareth Southgate គ្រូបង្វឹកក្រុមអង់គ្លេស រងការរិះគន់ច្រើនបន្ទាប់ពីលោកសម្រេចចិត្តមិនព្រមផ្លាស់ប្ដូរ Phil Foden ឱ្យចូលលេងជាមួយក្រុមអាមេរិកកាលពីយប់មិញនេះ។
ក្រុមខ្លាំងអង់គ្លេស លេងបានត្រឹមស្មើជាមួយជាមួយក្រុមអាមេរិក ០-០ ប៉ុណ្ណោះក្នុងការប្រកួត World Cup 2022 កន្លងទៅ។ ក្រុមដែលត្រូវបានគេគិតថាអាចនឹងឈ្នះពាននេះ មានកីឡាករល្អៗច្រើន និងប្រកួតទី១កន្លងទៅយកឈ្នះអ៊ីរ៉ង់បានដល់ទៅ ៦-២ ឯណោះ។ តែគួរឱ្យស្ដាយ នៅប្រកួតទី២ទល់ក្រុមអាមេរិក ក្រុមតោកំណាចមិនអាចធ្វើអ្វីបានទេ ដោយបញ្ចប់ទៅក្នុងលទ្ធផល ០-០ ។ ប្រកួតនេះ អ្នកគាំទ្ររិះគន់ទៅលើគ្រូបង្វឹក បន្ទាប់ពីលោក Southgate សម្រេចមិនដាក់ Foden ឱ្យចូលលេង។
តែគ្រូបង្វឹកអង់គ្លេសវិញ បាននិយាយថាលោកសម្រេចចិត្តបែបនេះក៏ព្រោះតែក្នុងប្រកួតនេះ លោកចង់បង្កើនការប្រយុទ្ធបន្ថែមទៀត។ ការដាក់ Jack Grealish និង Rashford ឱ្យចូលលេង នឹងធ្វើឱ្យក្រុមកាន់តែមានកម្លាំងប្រយុទ្ធកើនឡើងបន្ថែមទៀត។ ដូច្នេះហើយ ទើបលោកមិនអាចដាក់ Foden ឱ្យចូលលេងបាន៕