ក្រុមជម្រើសជាតិកាតា បានធ្លាក់ចេញពីការប្រកួត FIFA World Cup 2022 ហើយ ក្រោយពីពួកគេបរាជ័យ២ប្រកួតជាប់គ្នាក្នុងការប្រកួតកន្លងទៅនេះ។
កាតា បានចំណាយប្រាក់រាប់ពាន់លានដុល្លារដើម្បីរៀបចំធ្វើជាម្ចាស់ផ្ទះព្រឹត្តិការណ៍បាល់ទាត់ដ៏ធំបំផុតនៅលើលោកនេះ។ តែគួរឱ្យស្ដាយ ប្រទេសនេះបានធ្លាក់ចេញពីពានរង្វាន់នេះទៅហើយ។ ២ប្រកួតក្នុងពូល ពួកគេចាញ់ទាំង២ប្រកួតតែម្ដង ដោយបើកឆាកលេងចាញ់ក្រុមអេក្វាឌ័រ ២-០ ហើយនៅយប់មិញនេះលេងចាញ់ក្រុមសេណេហ្គាល់ ៣-១ ទៀត។ តាមលទ្ធផលនេះ ពួកគេបានធ្លាក់ចេញដោយស្វ័យប្រវត្តិមុនគេហើយ។
រំលឹកថាក្នុងប្រវត្តិ World Cup ក្រុមដែលធ្វើជាម្ចាស់ផ្ទះមានតែ២ប្រទេសទេ ដែលធ្លាក់ត្រឹមវគ្គចែកពូល។ ដោយក្រុមទី១គឺអាហ្វ្រិកខាងត្បូងនៅឆ្នាំ២០១០ និងក្រុមទី២ ក្រុមកាតានៅឆ្នាំ២០២២នេះហើយ៕