លោក Fernando Santos គ្រូបង្វឹកក្រុមជម្រើសជាតិព័រទុយហ្គាល់ បានអះអាងថាក្នុងព្រឹត្តិការណ៍ FIFA World Cup ក្រុមទាំងអស់មិនអាចមើលស្រាលនរណាបានឡើយ ព្រោះសុទ្ធតែមានកម្រិតលេងល្អដូចគ្នា។
ក្រុមព័រទុយហ្គាល់នឹងត្រូវប្រកួតជាមួយក្រុមហ្គាណានៅរាត្រីនេះហើយសម្រាប់ការប្រកួតបើកឆាកពានរង្វាន់ FIFA World Cup 2022 ។ មុនការប្រកួតចាប់ផ្ដើម លោក Santos ដែលជាគ្រូបង្វឹកព័រទុយហ្គាល់មើលឃើញថាហ្គាណាមិនមែនជាក្រុមខ្សោយនោះទេ ហើយលោកក៏បានប្រាប់កូនក្រុមដែរថាប្រកួតនេះ ត្រូវប្រឹងលេងឱ្យបាន១០០%ដើម្បីយក៣ពិន្ទុដ៏សំខាន់។
គ្រូបង្វឹកដែលដឹកនាំព័រទុយហ្គាល់លើកពាន Euro 2016 អះអាងទៀតថានៅ World Cup មិនមាននរណាខ្លាំងជាងនរណាឡើយ។ ក្រុមទាំងអស់ដែលបានជាប់មកនេះ សុទ្ធតែមានសមត្ថភាព។ វប្បធម៌ដែលប្រទេសនៅអឺរ៉ុបខ្លាំងជាងប្រទេសដទៃបានចប់ទៅហើយ ព្រោះបច្ចុប្បន្នកីឡាករគ្រប់ប្រទេសសុទ្ធតែបានលេងនៅលីគធំៗទាំងអស់ និងហ្វឹកហាត់យ៉ាងត្រឹមត្រូវ។ ជាក់ស្ដែង មើលគំរូអាហ្សង់ទីន និងអាល្លឺម៉ង់ ដែលរបូតឱកាសយក៣ពិន្ទុពីក្រុមអារ៉ាប់ប៊ីសាអូឌីត និងជប៉ុនជាដើម៕