ខ្សែប្រយុទ្ធ Takefusa Kubo ជឿជាក់ថាក្រុមជម្រើសជាតិជប៉ុនរបស់ខ្លួននឹងអាចយកឈ្នះលើក្រុមអាល្លឺម៉ង់បានក្នុងការប្រកួតបើកឆាកពានរង្វាន់ FIFA World Cup 2022 ខាងមុខនេះ។
ក្រុមអាល្លឺម៉ង់ នឹងត្រូវប៉ះជាមួយក្រុមជប៉ុននៅម៉ោង៨យប់នេះក្នុងការប្រកួតបើកឆាកពូល E នៃពានរង្វាន់ FIFA World Cup 2022 នៅប្រទេសកាតា។ មុនការប្រកួតនេះចាប់ផ្ដើម ក្រុមខ្លាំងប្រចាំទ្វីបអាស៊ី ជប៉ុន មានទំនុកចិត្ត និងជឿជាក់ថាពួកគេអាចនឹងទទួលបានលទ្ធផលល្អក្នុងការប្រកួតបើកឆាកនេះ បើទោះជាអាល្លឺម៉ង់ជាក្រុមខ្លាំងនៅអឺរ៉ុបក៏ដោយ។
ខ្សែប្រយុទ្ធ Kubo បាននិយាយមុនការប្រកួតថា៖ “ខ្ញុំមានអារម្មណ៍ល្អ។ យើងបានរៀបចំរួចរាល់អស់ហើយសម្រាប់ការប្រកួតដ៏សំខាន់នេះ។ យើងមានទំនុកចិត្ត ហើយយើងនឹងព្យាយាមដើម្បីយកឈ្នះការប្រកួតនេះឱ្យបាន”។ រំលឹកថា ជប៉ុន ស្ថិតនៅពូល E នេះជាមួយក្រុមខ្លាំង២ទៀតគឺអេស្ប៉ាញ និងកូស្តារីកា៕