ខ្សែប្រយុទ្ធ Lionel Messi បានប្រាប់ទៅអ្នកគាំទ្រអាហ្សង់ទីន ថាមិនត្រូវអស់សង្ឃឹមនោះទេ ព្រោះការប្រកួតនៅសល់ដល់ទៅ២ប្រកួតទៀតឯណោះក្នុងពូលនៃពានរង្វាន់ FIFA World Cup 2022 ។
ក្រុមជម្រើសជាតិអាហ្សង់ទីន បានបរាជ័យក្រោមថ្វីជើងក្រុមអារ៉ាប់ប៊ីសាអូឌីតក្នុងលទ្ធផល ២-១ នាការប្រកួតបើកឆាក World Cup របស់ពួកគេ។ ជើងខ្លាំងមកពីអាមេរិកឡាទីន មុនការប្រកួតត្រូវបានគេមើលឃើញថានឹងយក៣ពិន្ទុបានមិនពិបាកនោះទេពីក្រុមក្នុងតំបន់អាស៊ី ប៉ុន្ដែដល់ការប្រកួតជាក់ស្ដែងវិញ ឃើញថាអារ៉ាប់បីសាអូឌីតធ្វើបានល្អជាង រហូតវាយបកយកឈ្នះទាល់តែបានក្នុងលទ្ធផល ២-១ យ៉ាងគួរឱ្យភ្ញាក់ផ្អើល។
ក្រោយពីចប់ការប្រកួតនេះដែរ Messi បាននិយាយថា៖ “វាពិបាកក្នុងការនិយាយ ព្រោះយើងមិនរំពឹងថាចាប់ផ្ដើមពីចំណុចនេះទេ។ យើងមានអារម្មណ៍ថាដូចស្លាប់នៅពេលចប់ការប្រកួតនេះ។ រឿងដែលកើតសុទ្ធតែមានហេតុផល។ យើងមិនផ្ដោតលើប្រកួតនេះទៀតទេ យើងត្រូវផ្ដោតលើការប្រកួតខាងមុខ។ យើងនៅសល់២ប្រកួតទៀតដែលទាមទារឈ្នះឱ្យទាល់តែបាន”៕