នេះជាលើកទី១ហើយក្នុងលីគកម្ពុជា ដែលអ្នកចាំទីក្រុមទាំងសងខាងសុទ្ធតែទទួលបានកាតក្រហមក្នុងការប្រកួត ក្នុងជំនួបវិសាខា ប៉ះជាមួយក្រុមបឹងកេត។
ក្នុងការប្រកួតខាងលើនេះដែរ អ្នកចាំទី ហ៊ុល គឹមហ៊ុយ របស់បឹងកេត ទទួលបានកាតក្រហមតាំងពីដើមតង់ទី១ ក្នុងនាទី១៤មកម្ល៉េះ ក្រោយពីគេបានបង្កកំហុសទៅលើកីឡាកររបស់វិសាខា ក្នុងតំបន់គ្រោះថ្នាក់។ ដោយឡែកនៅនាទី២២ ក៏ស្រាប់តែ កែវ សុខសិលា របស់វិសាខា បានកាតក្រហមវិញដូចគ្នា ក្រោយពីទៅបង្កកំហុសធ្ងន់ធ្ងរលើកីឡាករ ម៉ាត់ ណូរុន។ ដូច្នេះ ក្រុមទាំងសងខាងសល់គ្នាត្រឹម១០នាក់ ហើយក៏បាត់បង់អ្នកចាំទីដូចគ្នា។ ចុងបញ្ចប់ ក្រុមវិសាខា នៅតែធ្វើបានល្អ យកឈ្នះលើក្រុមបឹងកេតបានដដែលក្នុងលទ្ធផល ៥-៣។
ជាមួយលទ្ធផលនេះដែរ វិសាខា បានឡើងទៅឈរនៅកំពូលតារាងលីគកំពូលកម្ពុជា ដោយមាន៣ពិន្ទុលើសក្រុមលេខ២ទៅហើយ។ ពេលនេះ វិសាខា មាន៤៩ពិន្ទុ និងស្វាយរៀង ហើយភ្នំពេញក្រោនមាន៤៦ពិន្ទុ។ ក្រុមបឹងកេត មាន៣៩ពិន្ទុ៕