ក្រុមជម្រើសជាតិបារាំង នឹងមិនកោះហៅខ្សែប្រយុទ្ធថ្មីមកជំនួសកីឡាករ Karim Benzema នោះទេ ដែលរូបគេត្រូវបានដកឈ្មោះចេញកាលពីពេលថ្មីៗនេះ។
Benzema ត្រូវបានដកឈ្មោះចេញ ដោយសារតែរូបគេមានបញ្ហារបួសសាច់ដុំភ្លៅអំឡុងពេលហ្វឹកហាត់។ ម្ចាស់ពានរង្វាន់ Ballon dÓr ឆ្នាំ២០២២នេះ ត្រូវបានអ្នកគាំទ្ររំពឹងថានឹងជួយក្រុមបារាំងបានច្រើនក្នុងការប្រកួត World Cup ដែលចាប់ផ្ដើមនៅរាត្រីនេះ ប៉ុន្តែវាជារឿងគួរឱ្យសោកស្ដាយដែរ ដែលរូបគេត្រូវបានដកឈ្មោះចេញវិញដោយសារតែបញ្ហារបួស។ ដោយរបួសនេះទៀតសោត ក៏ធ្វើឱ្យគេខកខានលេងឱ្យក្លឹបអាជីព Real Madrid ជាច្រើនប្រកួតមកហើយដែរ។
លោក Didier Deschamps គ្រូបង្វឹកក្រុមជម្រើសជាតិបារាំងបាននិយាយថា៖ “ខ្ញុំពិតជាសោកស្ដាយចំពោះ Karim ដែលរូបគេជាកីឡាករសំខាន់ក្នុងក្រុម។ ហើយសម្រាប់បេក្ខភាពជំនួសគេវិញ យើងក៏មិនជ្រើសរើសថ្មីទៀតដែរ”។ រំលឹកថាក្រុមការពារតំណែងជើងឯកនេះ មានកីឡាករសំខាន់ៗរបួសច្រើននាក់មែនទែន។ ជាក់ស្ដែង Paul Pogba និង Kante ជាដើម សុទ្ធតែរបួសមិនអាចចូលលេងបានទាំងអស់៕