ស្ដេចប្រដាល់ អេ ភូថង និងជាគ្រូបង្វឹករបស់កីឡាករ ធឿន ធារ៉ា បានអះអាងថាកូនសិស្សរបស់លោកមានសមត្ថភាពគ្រប់គ្រាន់ក្នុងការវាយដណ្ដើមយកខ្សែក្រវ៉ាត់នៅសង្វៀន Thai Fight បាន។
ធឿន ធារ៉ា នឹងមានវត្តមានប្រកួតនៅសង្វៀន Thai Fight នាថ្ងៃទី២០ខែវិច្ឆិកាឆ្នាំ២០២២ខាងមុខនេះក្នុងការប្រកួតប្រជែងយកខ្សែក្រវ៉ាត់ផងដែរ។ ដោយជុំដំបូងត្រូវប៉ះកីឡាករបារាំងសិន ហើយប្រសិនបើឈ្នះនឹងឡើងទៅប៉ះកីឡាករ សៃយុគ ទៀតដើម្បីដណ្ដើមយកខ្សែក្រវ៉ាត់ប្រភេទទម្ងន់៧២គីឡូក្រាម។ ដោយការប្រកួតនេះទៀតសោត នឹងក្លាយជាការប្រកួតធំនៅចុងឆ្នាំមិនខាន។
បើតាមការបញ្ជាក់របស់លោក អេ ភូថង ថា៖ “ខ្ញុំចង់ឱ្យធារ៉ា ប៉ះសៃយុគតែម្ដង ព្រោះធ្វើបែបនេះនឹងពេញកម្លាំងដូចគ្នា វៃគ្នាល្អមើល។ ធារ៉ា និងសៃយុគ ជាកីឡាករឈរវាយដូចគ្នា ដូច្នេះបើនរណាភ្លាត់ អ្នកនោះហើយនឹងចាញ់។ ខ្ញុំជឿថាគាត់មានកម្លាំងចិត្តវាយនៅលើកនេះ ហើយនឹងអាចទទួលបានលទ្ធផលល្អមិនខាន”៕