លោក Conor Nestor បានចាត់ទុកក្រុមភ្នំពេញក្រោន ជាក្រុមដែលកំពុងឡើងជើងក្នុងលីគកំពូលកម្ពុជានាពេលបច្ចុប្បន្ននេះ មុនការប្រកួតរវាងក្រុមទាំងពីរកើតឡើងនៅរសៀលនេះ។
ព្រះខ័នរាជស្វាយរៀង នឹងត្រូវបើកទ្វារកីឡដ្ឋានខេត្តស្វាយរៀងទទួលភ្ញៀវភ្នំពេញក្រោននៅម៉ោង៦ និង៣០នាទីល្ងាច។ ខណៈដែល២ប្រកួតចុងក្រោយរបស់ក្រុមម្ចាស់ផ្ទះ ហាក់ធ្វើមិនបានល្អនោះទេ ដោយចាញ់បឹងកេត ២-១ និងបន្ដចាញ់វិសាខា ១-០ ទៀត។ ស្របពេលខាងក្រោនវិញ បានបង្កភាពភ្ញាក់ផ្អើលដោយឈ្នះវិសាខា ៤-៣ ហើយបន្ដស្មើបឹងកេត ១-១ ដែរ។ ដូច្នេះបើតាមលទ្ធផល២ប្រកួតចុងក្រោយនៃការប្រកួត Play-off នេះ មានន័យថាក្រោនកំពុងមានថាមពលនិងទំនុកចិត្តច្រើនហើយ។
សម្រាប់ការប្រកួតនេះដែរ លោក Conor Nestor បាននិយាយដែរថា៖ “ជាការពិតណាស់ យើងដឹងថាទម្រង់លេងរបស់យើងគឺមិនល្អទេ។ ពួកយើងដឹងថាមូលហេតុអ្វីដែលធ្វើឱ្យយើងបរាជ័យ។ យើងត្រូវតែពង្រឹងក្រុម និងពង្រឹងស្មារតីឡើងវិញ វាគឺជាហេតុផលដែលយើងស្ថិតនៅលើកំពូលតារាងនៃលីគនេះជាង២៧០ថ្ងៃមកហើយ។ យើងមានពេលរៀបចំ និងប្រមូលកម្លាំងឡើងវិញពុំទាន់គ្រប់គ្រាន់ទេ ប៉ុន្តែពិតណាស់ក្រុមទាំងពីរបានស្គាល់ពីគ្នាបានច្បាស់ណាស់។ ក្រោនគឺជាក្រុមដែលកំពុងឡើងជើងនៅក្នុងលីគនាពេលឥឡូវនេះ។ យើងចាំបាច់ត្រូវតែ ជម្រុះចេញនូវចំណុចខ្វះខាតចេញ ហើយធ្វើការងារយើងឱ្យបានល្អ ហើយធ្វើឱ្យមានការគាំទ្របន្ថែមទៅកាន់ Marcus”៕