អ្នកគាំទ្រមានការរិះគន់ខ្លាំងទៅលើលោក Erik ten Hag ដែលបានផ្លាស់ប្ដូរខ្សែការពារ Harry Maguire ចូល ប៉ុន្តែដាក់ទៅលើនៅតំបន់ប្រយុទ្ធខាងលើជាមួយ Cristiano Ronaldo ទៅវិញ។
នៅយប់មិញនេះ Manchester United បានយកឈ្នះលើក្រុម Real Sociedad ក្នុងលទ្ធផល ១-០ តែទោះជាបាន៣ពិន្ទុនេះមែន ក្រុមបិសាចក្រហមនៅតែរក្សាចំណាត់ថ្នាក់លេខ២ក្នុងពូលដដែល។ ក្នុងការប្រកួតនេះដែរ អ្វីដែលធ្វើឱ្យអ្នកគាំទ្រភ្ញាក់ផ្អើលថែមទៀតនោះ គឺនៅចុងម៉ោងដោយលោក Ten Hag បានប្ដូរ Maguire ចូល។ ការដូរចូលនេះដែរ មិនមែនលេងនៅតំបន់ការពារនោះទេ ពោលគឺអ្នកចាត់ការក្រុមបានដូរ Maguire ទៅលេងនៅតំបន់ប្រយុទ្ធជំនួសកន្លែងរបស់ Garnacho ទៅវិញ។
កត្ដានេះទើបធ្វើឱ្យអ្នកគាំទ្ររិះគន់ទៅលើការដឹកនាំក្រុមរបស់លោក Ten Hag ដោយសូម្បី Paul Scholes អតីតកីឡាករ Man Utd ផ្ទាល់ក៏រិះគន់ដូចគ្នា។ Paul Scholes បានអះអាងថាលោកមិនយល់ពី Ten Hag គិតអ្វីនោះទេដែលប្ដូរបែបនេះ ខណៈ ដែលក្រុមត្រូវការឈ្នះគ្រាប់បន្ថែមទៀត។ ការលេងរបៀបនេះ វាជាការបង្ហាញឱ្យឃើញថា Man Utd កំពុងរញ៉េរញ៉ៃទៅហើយ៕