សហព័ន្ធបាល់ទាត់អន្ដរជាតិ FIFA បានសរសេរសំបុត្រទៅកាន់ក្លឹបទាំង៣២ដែលមានវត្ដមានត្រូវលេង FIFA World Cup 2022 នៅប្រទេសកាតា ឱ្យផ្ដោតតែលើបាល់ទាត់ប៉ុណ្ណោះ មិនឡូកដៃចូលការងារអ្វីផ្សេងទៀតនោះទេ។
កាតា ដែលជាប្រទេសម្ចាស់ផ្ទះព្រឹត្ដិការណ៍ FIFA World Cup 2022 បានរងនូវបទចោទប្រកាន់ច្រើន ជាពិសេសពីសំណាក់ប្រទេសនៅបណ្ដាអឺរ៉ុបទៅលើសិទ្ធិមនុស្ស ដែលពួកគេបានប្រើប្រាស់កម្លាំងពលកម្ម កម្មករលើសកម្រិតក្នុងការធ្វើកីឡដ្ឋាន។ មានប្រភពជាច្រើនបានចុះផ្សាយថា ដើម្បីរៀបចំឱ្យទាន់ការប្រកួត World Cup នៅប្រទេសកាតា បានជំរុញឱ្យកម្មករធ្វើការលើសកម្លាំង និងមានអ្នកស្លាប់ជាច្រើននាក់ថែមទៀត។ ដូច្នេះហើយ អំឡុងពេល World Cup នេះ បណ្ដាប្រទេសមួយចំនួនមានគម្រោងបង្ហាញពីការគាំទ្រដល់សិទ្ធិមនុស្ស និងចេញមុខការងារទៅលើការរំលោភបំពានផ្សេងៗផងដែរ។
ដោយសារតែដឹងពីគម្រោងមុនបែបនេះហើយ ទើបបានជា FIFA បានផ្ញើលិខិតប្រាប់មុន មិនឱ្យបណ្ដាប្រទេសទាំងអស់ដែលចូលរួមធ្វើជ្រុលពេកនោះទេ ចំពោះការគាំទ្រដល់សិទ្ធិមនុស្សរបស់ពួកគេ។ ដោយក្នុងលិខិតបានសរសរបញ្ជាក់ច្បាស់ថា ក្រុមដែលចូលរួមលេង World Cup 2022 សូមផ្ដោតតែលើការលេងបាល់ទាត់មួយប៉ុណ្ណោះ កុំបង្កើតជាសកម្មភាពអ្វីផ្សេងទៀត៕