ខ្សែការពារ Gerrard Pique បានប្រកាសចូលនិវត្តន៍ពីវិស័យបាល់ទាត់យ៉ាងគួរឱ្យភ្ញាក់ផ្អើលកាលពីយប់មិញនេះ ក្រោយពីរូបគេចំណាយពេល១៤ឆ្នាំនៅ FC Barcelona ។
កីឡាករវ័យ៣៥ឆ្នាំ នឹងលេងប្រកួតចុងក្រោយរបស់គេនៅចុងសប្ដាហ៍នេះតែម្ដងឱ្យក្រុម FC Barcelona ។ ក្រោយពីនោះទៅ Legend របស់ក្រុមអ្នកមានបុណ្យនឹងព្យួរស្បែកជើងហើយ។ រឿងនេះ បានធ្វើឱ្យអ្នកគាំទ្របាល់ទាត់មានការភ្ញាក់ផ្អើលផងដែរ ព្រោះ Pique ទើបមានបញ្ហាគ្រួសារជាមួយ Shakira ប៉ុន្មានខែមុននេះទេ ហើយឥឡូវក៏ស្រាប់តែចូលនិវត្ដន៍ពីវិស័យបាល់ទាត់ទៀត។
កីឡាករជម្រើសជាតិអេស្ប៉ាញរូបនេះ ចំណាយពេល១៤ឆ្នាំជាមួយក្រុម Barcelona និងបានជួយក្លឹបនេះឈ្នះពានរង្វាន់រហូតដល់ទៅ៣០ពានឯណោះក្នុងការបង្ហាញខ្លួន៦០០ប្រកួត។ ដោយពានធំៗមាន La Liga ៨ដង Champions League ៣ដង និង Copa del Rey ៧ដង។ នៅមួយរយៈចុងក្រោយនេះ គេមិនសូវបានលេងនោះទេ ហើយលោក Xavi ក៏បញ្ជាក់ Pique អាចរកក្លឹបថ្មីលេងផងដែរ តែសាមីខ្លួនមិនព្រមទៅណាចង់លេងឱ្យតែ Barcelona មួយគត់។ ក្រៅពីក្លឹបអ្នកមានបុណ្យនេះ គេមានតែជម្រើសចូលនិវត្តន៍ទេ៕