Keisuke Honda នៅតែបន្ដជឿជាក់លើការដឹកនាំក្រុមជម្រើសជាតិកម្ពុជាតាមអនឡាញរបស់លោក បើទោះជាកន្លងមកនេះមានការរិះគន់ច្រើនចំពោះលទ្ធផលមិនល្អយ៉ាងណាក៏ដោយ។
Honda បានធ្វើការ Live វីដេអូឆ្លើយសំនួរអ្នកគាំទ្រនៅលើបណ្ដាញសង្គមកាលពីម្សិលមិញនេះ។ មានសំនួរជាច្រើនបានចោទសួរទៅវីរបុរសបាល់ទាត់ជប៉ុន ដែលស្ម័គ្រចិត្តមកដឹកនាំក្រុមកម្ពុជាដោយមិនយកប្រាក់ខែខាងលើនេះ។ ក្នុងនោះក៏មានការសួរនាំទៅលើការដឹកនាំតាម Online របស់លោកផងដែរ ក្រោយពីកម្ពុជាធ្វើមិនសូវបានល្អនៅឆ្នាំនេះ។
លោក Honda បានអះអាងថាលោកនៅតែជឿជាក់ និងបន្ដដឹកនាំក្រុមកម្ពុជាតាមរបៀបអនឡាញនេះដដែល ក៏ព្រោះតែលោកជឿជាក់ថាវាមិនប៉ះពាល់អ្វីនោះទេ។ ការលេងរបស់ក្រុមគឺស្ថិតនៅលើរបៀបរៀបចំ ហើយចំពោះការមើលជើងកីឡាករវិញលោកក៏មានជំនួយការច្រើននាក់នៅកម្ពុជាដើម្បីតាមដានដូចគ្នា។ ដូច្នេះមិនចាំបាច់អ្វីដែលលោកត្រូវនៅកម្ពុជារហូត ដើម្បីមើលជើងកីឡាករនោះទេ៕