ការយកឈ្នះលើក្រុមសិង្ហបុរី ២-១ ដើម្បីទទួលបានតំណែងជើងឯក ក្នុងការប្រកួតប្រចាំតំបន់ Asia/Oceania Group IVនេះ បានជួយឱ្យក្រុមជម្រើសជាតិវាយកូនបាល់កម្ពុជា ឡើងទៅលេងនៅកម្រិត៣Asia/Oceania Group III នៃព្រឹត្តិការណ៍ Davis Cup 2023 ហើយ។
ក្រុមកីឡាវាយកូនបាល់ជម្រើសជាតិកម្ពុជា បានសម្រេចគោលដៅដ៏ធំមួយ ក្នុងការឡើងទៅប្រកួតកម្រិត៣ ប្រចាំតំបន់អាស៊ី/អូសេអានី (Asia/Oceania Group III) វិញ នៃព្រឹត្តិការណ៍វាយកូនបាល់ពិភពលោក Davis Cup 2022 បន្ទាប់ពីយកឈ្នះក្រុមជម្រើសជាតិសិង្ហបុរី ក្នុងវគ្គផ្ដាច់ព្រ័ត្រ នៅទីក្រុង Isa Town ប្រទេសបារ៉ែន។ នេះគឺជាការសម្រេចជោគជ័យមួយដ៏ធំរបស់ក្រុមកីឡាវាយកូនបាល់កម្ពុជា ដែលបានត្រឡប់ទៅកាន់កៅអីកម្រិត៣ នៃព្រឹត្តិការណ៍ពិភពលោកនេះវិញ បន្ទាប់ពីខកខានអស់រយៈពេល ៦ឆ្នាំ ហើយក៏ជាការសម្រេចគោលដៅមួយដ៏ធំ ក្នុងផែនការរបស់សហព័ន្ធ សម្រាប់ដំណើរឆ្ពោះទៅព្រឹត្តិការណ៍ប្រវត្តិសាស្ដ្រស៊ីហ្គេម លើកទី៣២ ឆ្នាំ២០២៣ នៅកម្ពុជា នាពេលខាងមុខផងដែរ។
ការប្រកួតកីឡាវាយកូនបាល់កម្រិតពិភពលោក Davis Cup 2022 នេះ កម្ពុជាបានបញ្ជូនកីឡាករ ៥រូបចូលរួម គឺមានកីឡាករ ឡុង សំនៀង, ឃ្លាំង ពន្លក, ប៊ុន កេន្នី (ខ្មែរ-បារាំង), Tep Timothy និង Matthew David Krusling។ នេះជាជោគជ័យដ៏ប្រសើរសម្រាប់ក្រុមវាយកូនបាល់កម្ពុជា ដើម្បីជាទំនុកចិត្តសម្រាប់ត្រៀមលក្ខណៈធ្វើម្ចាស់ផ្ទះការ ប្រកួតកីឡាស៊ីហ្គេម លើកទី៣២ នាឆ្នាំ២០២៣ ខាងមុខ៕