ខ្សែប្រយុទ្ធ Neymar សើចហួសចិត្តនៅពេលបានឃើញមិត្តរួមក្រុមនៅជម្រើសជាតិប្រេស៊ីល Vinicius ស្ថិតនៅចំណាត់ថ្នាក់លេខ៨ក្នុងបញ្ជីឈ្មោះ Ballon dÓr ។
កាប្រកាសអ្នកឈ្នះពាន Ballon dÓr នៅម្សិលមិញនេះ បានធ្វើឱ្យមានការវិភាគនិងរិះគន់មួយចំនួនទៅលើអ្នករៀបចំផងដែរ។ Karim Benzema ជាបេក្ខភាពឈ្នះពានរង្វាន់នេះ គឺត្រូវបានអ្នកគាំទ្រសាទរជាខ្លាំង ប៉ុន្ដែពានដទៃទៀត និងចំណាត់ថ្នាក់មួយចំនួនក៏មានមតិឱ្យយោបល់ផ្សេងៗគ្នាផងដែរ។ ជាក់ស្ដែង Neymar បានបង្ហាញចំណាប់អារម្មណ៍នៅពេលឃើញ Vinicius ស្ថិតនៅលេខ៨ក្នុងតារាង។ ដោយតារានៅក្លឹប PSG អះអាងថាកីឡាករវ័យក្មេងរូបនេះសក្ដិសមស្ថិតនៅ Top3 មិនមែននៅលេខ៨នោះទេ ព្រោះគេមានរដូវកាលដ៏ល្អមិនចាញ់ Benzema ឡើយ។
Vinicius រកបាន២១គ្រាប់ និងបញ្ជូនបាល់ឱ្យមិត្តរួមក្រុមបាន២០គ្រាប់ដែរកាលពីរដូវកាលមុន។ អ្វីដែលពិសេសទៀតនោះ គេជាអ្នករកបានគ្រាប់បាល់ជ័យជម្នះលើក្រុម Liverpool ក្នុងការប្រកួតវគ្គផ្ដាច់ព្រ័ត្រពានរង្វាន់ UEFA Champions League ថែមទៀត។ តែគួរឱ្យស្ដាយ រូបគេស្ថិតនៅចំណាត់ថ្នាក់លេខ៨ឯណោះក្នុងបញ្ជីឈ្មោះ Ballon dÓr នាឆ្នាំនេះ៕