កីឡាករ រឿង សោភ័ណ្ឌ បានចាត់ទុកការជាប់ជម្រើសជាតិប្រដាល់គុនខ្មែររបស់ខ្លួនត្រៀមស៊ីហ្គេម លើកទី៣២ ឆ្នាំ២០២៣ គឺជាប្រការសំខាន់បំផុតក្នុងអាជីពប្រដាល់របស់ខ្លួន។
កីឡាករល្បីឈ្មោះរបស់កម្ពុជារូបនេះបាននិយាយថា ៖«ក្នុងនាមយើងជាម្ចាស់ផ្ទះ យើងមានតែការខិតខំ ប្រឹងប្រែងប៉ុណ្ណោះ ដើម្បីស្វែងរកមេដាយជូនជាតិ។ ខ្ញុំចាត់ទុកកម្មវិធីនេះសំខាន់ណាស់សម្រាប់អាជីពរបស់ខ្ញុំ ពីព្រោះយើងវ៉ៃក្នុងដីយើង ហើយតំណាងឲ្យជាតិទៀត។ ដូច្នេះខ្ញុំក៏គ្មានអ្វីក្រៅពីការប្រឹងប្រែងហ្វឹកហាត់ឲ្យបានខ្លាំងជាងមុន ដើម្បីសម្រេចក្ដីបំណងប៉ុណ្ណោះ»។
រឿង សោភ័ណ្ឌ ជាជើងខ្លាំងរបស់កម្ពុជាក្នុងប្រភេទទម្ងន់៧១គីឡូក្រាម ដែលឆ្លងកាត់ការប្រកួតលើសង្វៀនគុនខ្មែរ១៥១ដង ក្នុងនោះឈ្នះ១២៩ ចាញ់១៧ ស្មើ៥ដង៕