Graham Potter បារម្ភថា N’Golo Kante បានរងរបួសមួយផ្សេងទៀត ខណៈដែលអ្នកចាត់ការក្រុម Chelsea បង្ហើបថាខ្សែបម្រើ “បង្ហាញអាការៈក្នុងពេលហ្វឹកហាត់” មុនពេលការប្រកួត Champions League ជាមួយ AC Milan។
កីឡាករសញ្ជាតិបារាំងវ័យ ៣១ ឆ្នាំរូបនេះមិនបានលេងតាំងពីពាក់កណ្តាលខែសីហាមកម្ល៉េះ បន្ទាប់ពីរបួសសរសៃពួរ ហើយ Potter សង្ឃឹមថាគេនឹងត្រឡប់មកជួយក្រុមវិញក្នុងពេលឆាប់ៗនេះ។
ទោះបីជាយ៉ាងណាក៏ដោយ កាលពីយប់ថ្ងៃច័ន្ទ គាត់បានបង្ហើបថា បុគ្គលិកពេទ្យរបស់ Chelsea កំពុងរង់ចាំលទ្ធផលនៃការធ្វើតេស្ត បន្ទាប់ពី Kante បានសម្រាកក្នុងការហ្វឹកហាត់។
Potter បាននិយាយថា “យើងកំពុងរង់ចាំលទ្ធផលតេស្តរបស់ N’Golo – គាត់បង្ហាញអាការៈក្នុងពេលហ្វឹកហាត់ ដូច្នេះយើងកំពុងរង់ចាំព័ត៌មាននោះ។ វាពិតជាមិនល្អទេ ហើយវាជាការខកចិត្តសម្រាប់គាត់ និងសម្រាប់យើង។ យើងត្រូវរង់ចាំមើលពីទំហំរបួសរបស់គេឆាប់ៗនេះ”៕
ប្រភព៖ The Sun