លោក Didi Hamann អតីតកីឡាករ Liverpool បានអះអាងថាលោក Jurgen Klopp ជិតអស់ពេលដឹកនាំក្រុមហង្សក្រហមទៀតហើយ បន្ទាប់ពីលទ្ធផលមិនបានល្អសោះនៅដើមរដូវកាលនេះ។
Liverpool កំពុងចាញ់ក្រុមកំពូលតារាង Arsenal រហូតដល់១៤ពិន្ទុទៅហើយ បន្ទាប់ពីលេងចាញ់កាលពីចុងសប្ដាហ៍កន្លងទៅលទ្ធផល ៣-២។ ជាមួយការបរាជ័យផ្ទួនៗនេះដែរ បានធ្វើឱ្យក្រុមមួយនេះស្ថិតនៅពាក់កណ្ដាលតារាង ហើយស្ទើរតែបាត់ឱកាសទៅហើយក្នុងការប្រជែងពានរង្វាន់ ត្បិតអីក្រុមមានទម្រង់លេងមិនល្អ ហើយកីឡាករសំខាន់ៗរបួសច្រើនណាស់។
ដោយសារតែដូច្នេះហើយទើបលោក Didi Hamann កីឡាករធ្លាប់លេងនៅ Liverpool ពីឆ្នាំ១៩៩៩ដល់២០០៦ អះអាងថាពេលវេលាដឹកនាំក្រុមរបស់លោក Klopp នៅ Anfield កាន់តែកៀកនឹងបញ្ចប់ហើយ។ សមាជិកក្នុងក្រុមហាក់ដូចជាមិនទុកចិត្តលើលោកទៀតទេ កីឡាករម្នាក់ៗលេងមិនមានអារម្មណ៍ក្នុងខ្លួនសោះ។ នេះជាសម្ពាធធ្ងន់មួយសម្រាប់លោក Klopp ដើម្បីដោះស្រាយ ហើយប្រសិនបើនៅតែមិនល្អទៀត នោះលទ្ធផលនឹងពិបាកហើយ៕