លោក Igor Jovicevic គ្រូបង្វឹករបស់ក្រុម Shakhtar Donetsk បានបង្ហាញការគោរពដល់ទឹកចិត្តរបស់កូនក្រុមដែលផ្ដោតលើការប្រកួតផង ហើយបារម្ភពីគ្រួសារផង ដែលស្ថិតនៅប្រទេសអ៊ុយក្រែនកន្លែងរុស្ស៊ីកំពុងវាយប្រហារ។
ក្រុម Shakhtar Donetsk នឹងត្រូវតតាំងជាមួយក្រុម Real Madrid នៅទឹកដីកណ្ដាលប្រទេសប៉ូឡូញ ដោយសារតែនៅអ៊ុយក្រែនកំពុងមានសង្គ្រាមនៅឡើយ។ ខណៈដែលរុស្ស៊ី កំពុងវាយប្រហារលើបណ្ដារក្រុងនានាក្នុងប្រទេសដែលធ្វើឱ្យមានជនស្លូតត្រង់ស្លាប់ជាច្រើននាក់ និងរបួសរាប់រយនាក់ ដោយសារការបាញ់ស្រោចដោយមីស៊ីល។ កត្ដានេះ ក៏មានឥទ្ធិពលដល់កីឡាករក្រុម Shakhtar ផងដែរ ត្បិតអីសមាជិកគ្រួសាររបស់ពួកគេរស់នៅក្នុងប្រទេសអ៊ុយក្រែន មិនបានចាកចេញទៅណាទេ។
បើតាមលោក Igor Jovicevic បាននិយាយថា៖ “ខ្ញុំកំពុងរកលំនឹងក្នុងក្រុម ជាពិសេសការលេងទល់ក្រុមខ្លាំងដូច Real Madrid ។ សមាជិកក្រុមរបស់យើងកំពុងពិបាកចិត្តជាមួយហេតុការណ៍កើតឡើងនៅអ៊ុយក្រែន។ គ្រួសាររបស់ពួកគេសុទ្ធតែស្ថិតនៅតំបន់មានជម្លោះ។ ពួកគេត្រូវទូរសព្ទសួរសុខទុក្ខគ្រួសារជារៀងរាល់ថ្ងៃ។ នេះជាកត្ដាផ្លូវចិត្តមួយផងដែរសម្រាប់កីឡាករ មុនការប្រកួតធំមកដល់”៕