ខ្សែប្រយុទ្ធ Lionel Messi នឹងមិនអាចចូលលេងជួយក្រុម PSG ក្នុងការប្រកួតទល់ក្រុម Benfica ក្នុងពានរង្វាន់ UEFA Champions League នៅរាត្រីនេះបានទេ។
Messi ជាអ្នករកបាន១គ្រាប់ឱ្យ PSG ក្នុងការប្រកួតទល់ក្រុម Benfica កាលពីសប្ដាហ៍មុននៅជើងទី១។ ស្របពេលនៅជើងទី២នេះ នឹងមិនមានវត្ដមានរបស់កីឡាករអាហ្សង់ទីននេះទៀតទេ ដោយសារតែបញ្ហារបួសសរសៃពួររបស់គេនៅមិនទាន់អាចជាសះស្បើយទាល់ពេលវេលា។ ដូច្នេះ PSG នៅតំបន់ខាងលើសល់ប្រយុទ្ធសំខាន់២នាក់ដដែលគឺ Neymar និង Mbappe ។
ការប្រកួតទល់ Benfica នៅរាត្រីនេះពិតជាសំខាន់ណាស់សម្រាប់ក្រុមអ្នកមានបារាំងមួយនេះ ព្រោះថាពួកគេមានពិន្ទុស្មើគ្នាតែម្ដង ឆ្លងកាត់៣ប្រកួត មាន៧ពិន្ទុដូចគ្នា។ ស្របពេលក្នុងពូលនេះដែរ នៅមានក្រុមខ្លាំងមួយទៀតដែលប្រជែងដែរនោះគឺ Juventus នៅលេខ៣ ទើបមាន៣ពិន្ទុប៉ុណ្ណោះ៕