គ្រូបង្វឹកក្រុម Barcelona លោក Xavi Hernandez បានជំរុញឱ្យក្រុមរបស់គាត់រិះគន់ខ្លួនឯង និងសម្លឹងមើលការកែលម្អមុនការប្រកួតរបស់ពួកគេជាមួយនឹងក្រុម Inter Milan។
Barcelona នឹងធ្វើជាម្ចាស់ផ្ទះទទួលស្វាគមន៍ក្រុមអ៊ីតាលី Inter Milan នៅ Spotify Camp Nou ក្នុងជំនួប UEFA Champions League នៅថ្ងៃពុធ ទី១២ ខែតុលានេះ។ ប្រសិនបើពួកគេបរាជ័យក្នុងការឈ្នះ នោះក្រុមរបស់ Xavi នឹងប្រឈមមុខកាន់តែខ្លាំងក្នុងការធ្លាក់ត្រឹមវគ្គចែកពូលនេះ។
បន្ទាប់ពីយកឈ្នះ ១-០ ទល់នឹង Celta Vigo ក្នុងក្របខ័ណ្ឌ La Liga នៅថ្ងៃអាទិត្យ ទី៩ ខែតុលា ក្រុម Barcelona ទទួលបាន ៣ពិន្ទុ ប៉ុន្តែបានបង្កើតឱកាសជាច្រើនទៅអោយក្រុម Celta ដែលជាសំណាង អ្នកចាំទីអាចរក្សា Clean Sheet បានល្អ។
ថ្លែងបន្ទាប់ពីការប្រកួត Xavi បានចេញសារយ៉ាងម៉ឺងម៉ាត់ទៅកាន់កូនក្រុមរបស់ខ្លួន ហើយបាននិយាយថា៖
“វាជាជ័យជំនះដ៏ល្អមួយ ប៉ុន្តែពួកយើងត្រូវតែជាក្រុមនៃ ៣០នាទីដំបូង។ តទៅមុខទៀត ប្រសិនបើយើងលេងដូចដែលយើងបានលេងក្នុងតង់ទីពីរនៅថ្ងៃនេះ វានឹងពិបាកក្នុងការយកឈ្នះក្រុម Inter”។
អ្នកចាត់ការក្លឹប Barcelona បានបន្តថា៖
“យើងត្រូវតែកែលម្អ យើងត្រូវតែរិះគន់ខ្លួនឯង។ តង់ទីមួយគឺល្អ ថាមពលក្នុងការលេងល្អ យើងបង្កើតឱកាសច្រើន ហើយយើងគ្រប់គ្រងការប្រកួត”។
Xavi សរុបមកវិញ៖
“យើងលេងមិនបានល្អទេនៅតង់ទីពីរ។ យើងអនុញ្ញាតឱ្យ Celta ដាក់សម្ពាធ។ ប្រហែលជាពួកយើងអស់កម្លាំង។ តាមចិត្តសាស្រ្ត យើងបានធ្លាក់ទឹកចិត្ត ហើយពួកគេមានឱកាសច្បាស់ៗពីរ ឬបីដង នៅពេលវាយបក៕
ប្រភព៖ Sportskeeda