Manchester United បាបញ្ចប់ការយកឈ្នះ ទៅលើ Everton កាលពីយប់មិញ ជាមួយលទ្ធផល ២-១ ដែលនាំឲ្យលំដាប់ពិន្ទុរបស់ពួកគេ ឡើងកាន់តែប្រកិតនឹង Chelsea ពោលខុសគ្នា ១ ពិន្ទុប៉ុណ្ណោះ។ យើងចាប់អារម្មណ៍ ថាក្រុមដឹកនាំដោយលោក Erik ten Hag ហាក់ធ្វើបានល្អគួរសម នៅ ២ ប្រកួតចុងក្រោយ ហើយចៃដន្យបំផុត គឺសុទ្ធជាគ្រាប់បាល់វាយបក ជៀសផុតការបរាជ័យ។
CTS SPORT បង្ហាញត្រួសៗអំពីលទ្ធផលកើតឡើងនៅ Europa League និង Premier League របស់ Man Utd នៅ ៥ ថ្ងៃកន្លងមកនេះ ក៏ដូចជាស្ថិតិនិងកំណត់ត្រាមួយចំនួនដែលអ្នកគួរដឹង៖
១) លទ្ធផល Comeback ទាំងពីរប្រកួត
កាលពីយប់ថ្ងៃព្រហស្បតិ៍ United បានធ្វើឲ្យអ្នកគាំទ្ររាងព្រួយចិត្តបន្តិចដែរ ក្រោយចប់តង់ទីមួយ ដោយពេលនោះក្លឹបម្ចាស់ដី Omonia បាននាំមុខមុន ១-០ ហើយគ្រប់យ៉ាងបានប្រែជាល្អ បន្ទាប់អ្នកចាត់ការសញ្ជាតិហូឡង់ ប្តូរការពារស្លាបឆ្វេង ពី Tyrell Malacia មកដាក់ Luke Shaw និងស្លាបប្រយុទ្ធសងខាង ពី Sancho/Antony មកដាក់ Martial និង Rashford។
គ្រាប់បាល់បានកើតឡើងដល់ទៅ ៣ គ្រាប់សម្រាប់ United នៅតង់ទី ២ ហើយបើទោះបីខាង Omonia អាចបន្ថែមមួយគ្រាប់នៅនាទី ៨៥ ក៏មិនជាបញ្ហាអ្វីដែរ ជារួមក្លឹបអង់គ្លេសនៅតែអាចរក្សាលទ្ធផលយកឈ្នះ ទទួលបាន ៣ ពិន្ទុពេញ។ គិតត្រឹមជុំទី ៣ នៅ Europa League ពួកគេឈរលេខ ២ នៅក្រោម Real Sociedad ហើយប្រកួតបន្ទាប់ត្រូវវិលមកប៉ះ Omonia ជាថ្មី តែសារនេះលេងក្នុងទឹកដី Old Trafford។
ងាកទៅក្របខ័ណ្ឌ Premier League ជុំទី ៨ របស់ United កាលពីយប់មិញ ក៏បានវាយបកគ្រាប់បាល់ តាមយកឈ្នះ Everton វិញដែរ ដោយខាងក្លឹបម្ចាស់ដី Goodison Park នាំមុខគ្រាប់បាល់មុខនៅនាទីទី ៥ ដោយកីឡាករ Alex Iwobi តែយ៉ាងណាគ្រាប់បាល់ខាង United ក៏កើតឡើងជាបន្តបន្ទាប់ មុនបញ្ចប់តង់ទី ១ នោះគឺនាទីទី ១៥ ដោយ Antony និងនាទី ៤៤ ដោយ Cristiano Ronaldo។
ប្រកួតបន្ទាប់ជុំទី ៩ United ក៏នឹងត្រូវបើកកីឡដ្ឋាន ស្វាគមន៍ក្លឹប Newcastle ដែលនេះក៏រាប់ជាជំនួបញាក់សាច់មួយដែរ ស្របពេលក្រុមដឹកនាំដោយលោក Eddie Howe កំពុងឈរលេខ ៦ ចាញ់ក្រុមលោក Erik ten Hag តែ ១ ពិន្ទុគត់។ យើងនឹងរង់ចាំអ៊ុតមើលលទ្ធផល ជាមួយការផ្សាយបន្តផ្ទាល់លើទំព័រ CTS SPORT នាវេលាម៉ោង ០៨:០០ នាទីយប់ ថ្ងៃអាទិត្យ ទី ១៦ តុលា។
២) ស្ថិតិនិងកំណត់ត្រាសំខាន់ៗ
រឿងដំបូងដែលគ្នាយើងក៏បានដឹងហើយនោះ គឺកំណត់ត្រាគ្រាប់បាល់នៅក្លឹបទី ៧០០ របស់ Cristiano Ronaldo ពោលមិនធ្លាប់មានកីឡាករណាសម្រេចបានពីមុនមកឡើយ។ នេះឆ្លងកាត់ការឈរជើងលើទីលាន អស់រយៈកាល ២០ ឆ្នាំ និង ២ ថ្ងៃ សម្រាប់បុរសសញ្ជាតិព័រទុយហ្គាល់ ដោយមាន ៥ គ្រាប់នៅក្លឹប Sporting CP, ១០១ គ្រាប់នៅក្លឹប Juventus, ១៤៤ គ្រាប់នៅក្លឹប Man Utd និង ៤៥០ គ្រាប់នៅក្លឹប Real Madrid។
ងាកទៅ Antony គេក៏បានក្លាយជាកីឡាករ Man Utd ដំបូងដែលអាចរកបានគ្រាប់បាល់ នៅ ៣ ប្រកួតដំបូងជាប់ក្នុងក្របខ័ណ្ឌ Premier League។ នេះស្ថិតិរដូវកាលថ្មី ៣ គ្រាប់របស់កីឡាករប្រេស៊ីល ក៏បាននាំមុខលើគ្រាប់បាល់របស់កីឡាករអេហ្សីប Mohamed Salah ទើបតែមាន ២ គ្រាប់ប៉ុណ្ណោះ។
ស្ថិតិគួរឲ្យចាប់អារម្មណ៍ចុងក្រោយ គឺ Man Utd បានក្លាយជាក្លឹបដំបូង ដែលអាចឈ្នះ ១០០ ប្រកួតនៅ Premier League ក្រោយការរបូតមួយគ្រាប់មុន ពីការស៊ុតរបស់ក្លឹបគូប្រជែង ពោលនៅពីលើក្លឹប Spurs ឈ្នះ ៩៦ លើក, Liverpool ឈ្នះ ៨៥ លើក និង Chelsea ឈ្នះ ៨៤ លើកជាដើម៕
ប្រភព៖ បរទេស