មិនខុសពីរដូវកាលមុនៗ Manchester City នៅតែបន្តសម្ញែងភាពខ្លាំងរបស់ខ្លួន នៅវគ្គចែកពូល Champions League ដូចកាលពីយប់មិញ លុតក្រុមមកពីដាណឺម៉ាកយ៉ាងស្ពឹកមុខ ក្រោមលទ្ធផល ៥-០។ គេចាប់អារម្មណ៍ស្ថិតិរបស់ម្ចាស់ដី Etihad ធ្វើបានល្អហួស តាំងពីចាប់ផ្តើម ដល់បញ្ចប់ការប្រកួត ហើយអ្នកហត់បំផុត គឺជាអ្នកចាំទី Kamil Grabara របស់ក្លឹប Copenhagen។
លេងពេញ ៩០ នាទី City ដូចបត់តារាងលេង ដោយគ្រប់គ្រងបាល់ ៧៦ ភាគរយ តាមរយៈការបញ្ជូនចុះឡើង ៨៥១ ប៉ះ ហើយស៊ុត ៣០ លើក ចំគោលដៅ ១៦ លើក ធៀបនឹងក្រុមភ្ញៀវ មានឱកាសគ្រប់គ្រងបាល់ត្រឹម ២៤ ភាគរយ ស៊ុតបាន ២ លើក ឥតចំគោលដៅសោះ។ ៥ គ្រាប់របស់ក្រុមលោក Pep Guardiola កើតចេញដោយថ្វីជើងបើកឆាក Erling Haaland នៅនាទី ៧ និង ៣២ មុនការកើតបាល់ Own Goal នៅនាទី ៣៩ ជាការស៊ុតក្រៅប្រអប់របស់ខ្សែការពារស្លាប Sergio Gomez ទៅឡងប៉ះជើងកីឡាករគូប្រជែង។
គ្រាប់បាល់ទី ៤ ធ្វើបានដោយ Riyad Mahrez ជាអ្នកបញ្ចប់ទីបាល់ ១១ ម៉ែត្រ ក្រោយ Haaland ត្រូវបានគ្រូរក្សាកម្លាំង អនុញ្ញាតឲ្យលេងតែមួយតង់ ហើយគ្រាប់បាល់ទី ៥ ធ្វើបានដោយ Julian Alvarez នៅនាទី ៧៦។ កីឡាករល្អបំផុតនៅប្រកួតនោះ គឺ Grealish ខណៈខាង Copenhagen គឺជាអ្នកចាំទី Grabara នោះឯង ក្រោយសង្រ្គោះបាល់ជាច្រើនលើកច្រើនសារដល់ទៅ ១២ លើក កុំអីហ្នឹង ក្រុមត្រូវរបូតដល់ ១០ គ្រាប់ក៏ថាបាន។
អ្នកចាំទីសញ្ជាតិប៉ូឡូញ ដកដង្ហើមមិនចង់ដល់គ្នា ព្រោះខាង City វាយសម្រុកឥតល្ហែរ ស៊ុតគ្រប់ច្រកអស់ហើយ ទាំងបាល់មុខទី បាល់ក្រៅប្រអប់ និងសូម្បីតែការតែត តាមរយៈបាល់ក្រុសចូល។ យ៉ាងណាកីឡាករវ័យ ២៣ ឆ្នាំ បានលាន់មាត់សរសើរដល់ខ្សែប្រយុទ្ធអាយុស្រករខ្លួន គឺ Halaand ថាគេមិនមែនជាមនុស្សឡើយ។
តាមការឲ្យដឹងពី Jack Grealish ជាមិត្តរួមទីលាននៅប្រកួតយប់មិញ បាននិយាយថា៖ “ស្មោះត្រង់ទៅ វាពិតជាអស្ចារ្យខ្លាំងណាស់ ខ្ញុំអត់ធ្លាប់ឃើញកីឡាករណាដូចជា Haaland ពីមុនមកទេ ទាំងគ្រាប់បាល់ទីមួយនិងទីពីរ ខ្ញុំត្រឹមឈរអស់សំណើច ហួសចិត្តនឹងគេតែងតែមានវត្តមាននៅទីតាំងនោះជានិច្ច”។
https://youtu.be/cHznkPeQPW4
កីឡាករអង់គ្លេសបន្តទៀតថា៖ “សូម្បីអ្នកចាំទី [Kamil Grabara] ក៏លាន់មាត់ប្រាប់មកខ្ញុំ ថា Haaland មិនមែនជាមនុស្សទេ ខ្ញុំក៏ឆ្លើយទាំងយល់ស្រប ហើយសង្ឃឹមថាកីឡាកររូបនេះ នឹងអាចបន្តទម្រង់លេងដ៏ល្អ រហូតអាចជួយយើងឆ្ពោះទៅការលើកពានរង្វាន់”។
គួរបញ្ជាក់ដែរថា ខ្សែប្រយុទ្ធសញ្ជាតិន័រវេស រកបាន Hat-trick ដល់ ៣ លើកហើយ ជាមួយស្ថិតិជារួម មាន ១៩ គ្រាប់និង Assist ៣ នៅ ១២ ប្រកួតឲ្យក្រុមលោក Pep Guardiola។ រាប់ពីបើករដូវកាលថ្មី គេរកបានគ្រាប់បាល់គ្រប់ការប្រកួតទាំងអស់ឲ្យ City លើកលែងតែការប៉ះ Bournemouth តែថ្ងៃនោះ ក៏គេបាន Assist មួយដែរ ទោះមិនស៊ុតបញ្ចូលទី៕
ប្រភព៖ បរទេស