កីឡាករជម្រើសជាតិម៉ូតូទឹក កៃ វ៉ាន់ស៊ីដែន បានឈ្នះមេដាយមាស ១គ្រឿង លើវិញ្ញាសា Novice ski stock ជូនកម្ពុជា កាលពីល្ងាចថ្ងៃទី០៤ ខែតុលាម្សិលមិញ ពីការប្រកួតកីឡាម៉ូតូទឹក ជ្រើសរើសជើងឯកពិភពលោក Jet Ski World Series Season 2022 ជុំទី២ នៅ Lake Havasu City, រដ្ឋ Arizona សហរដ្ឋអាមេរិក ចាប់ពីថ្ងៃទី៥-៩ ខែតុលា ឆ្នាំ២០២២។
ការប្រកួតកីឡាម៉ូតូទឹក នៅសហរដ្ឋអាមេរិកនេះ ក្រុមជម្រើសជាតិម៉ូតូទឹកកម្ពុជាចំនួន ៥រូប រួមមាន កីឡាករ សាលី អូម៉ើត, សាលី ហ្វីលីន, មីន ម៉ូស្តាន់, មីន អូស្មាន់ និងកីឡាករ កៃ វ៉ាន់ស៊ីដែន បានចូលរួមប្រកួតប្រជែងជាមួយអត្តពលិកខ្លាំងៗ ធ្លាប់ឈ្នះពានកម្រិតទ្វីបអាស៊ី អឺរ៉ុប និងពិភពលោក មកពីបណ្តាទ្វីបនានាជុំវិញពិភពលោក។ សាលី អូម៉ើត បន្តថា ការប្រកួតនេះ គឺជាការបន្សាំខ្លួនរបស់អត្តពលិកជម្រើសជាតិម៉ូតូទឹក ពង្រឹងសមត្ថភាព ដកស្រង់បច្ចេកទេស ត្រៀមដណ្តើមមេដាយ ពីព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើម្ចាស់ផ្ទះ។
ឯកឧត្តម ណុះ ស្លេះ ប្រធានសហព័ន្ធកីឡាម៉ូតូទឹកកម្ពុជា បានបង្ហាញមោទនភាពចំពោះអត្តពលិកជម្រើសជាតិម៉ូតូទឹកកម្ពុជា ដែលខិតខំប្រឹងប្រែងហ្វឹកហាត់ រហូតទទួលបានលទ្ធផលគួរជាទីមោទន ដោយកីឡាករ កៃ វ៉ាន់ស៊ីដែន ដណ្តើមបានមេដាយមាស ១គ្រឿង លើវិញាសា Novice ski stock៕