Barcelona គ្រោងនឹងដាក់ពាក្យបណ្តឹងជាផ្លូវការទៅកាន់ UEFA ជុំវិញការសម្រេចចិត្តរបស់អាជ្ញាកណ្តាលដ៏ចម្រូងចម្រាសកាលពីយប់ថ្ងៃអង្គារ ក្នុងអំឡុងពេលប្រកួត Champions League របស់ពួកគេជាមួយនឹងក្រុម Inter Milan នេះបើយោងតាមរបាយការណ៍នៅក្នុងប្រទេសអេស្ប៉ាញ។
ក្រុមយក្សកាតាឡាន់បានបាត់បង់ ៣ ពិន្ទុដ៏សំខាន់បន្ថែមទៀតនៅក្នុងពូល C នៅពេលដែលពួកគេបានបរាជ័យក្នុងលទ្ធផល ១-០ នៅកីឡដ្ឋាន San Siro។
ការសម្រេចចិត្តដែលបង្កើតឲ្យមានភាពចម្រូងចម្រាសធំបំផុតនៅក្នុងការប្រកួតនេះ បានកើតឡើងនៅពេលដែល VAR បដិសេធបាល់ប៉ះដៃពិន័យ១១ម៉ែត្រនៅក្នុងប្រអប់គ្រោះថ្នាក់ដែលបង្កឡើងដោយ Denzel Dumfries របស់ Inter Milan នៅចុងម៉ោង។
ទោះបីជាមានភស្តុតាងប៉ះដៃច្បាស់យ៉ាងណាក៏ដោយ អាជ្ញាកណ្តាល Slavko Vincic បានសម្រេចចិត្តប្រឆាំងនឹងបាល់ប៉ះដៃមួយនេះ ដែលបានធ្វើឱ្យអ្នកចាត់ការក្រុម Barcelona លោក Xavi ព្រមទាំងកីឡាករក្នុងទីលានមានការខឹងសម្បារយ៉ាងខ្លាំង។
យោងតាមកាសែតអេស្បាញ AS អះអាងថា Barcelona នឹងធ្វើពាក្យបណ្តឹងជាផ្លូវការទៅកាន់ UEFA តាមផ្លូវច្បាប់ដោយប្រើប្រាស់សេវាកម្មផ្ទៃក្នុងរបស់ក្លឹបផ្ទាល់។
ក្នុងពាក្យបណ្ដឹងនេះនឹងរួមបញ្ចូលនូវរូបភាពដើម្បីបង្ហាញពីអ្វីដែលពួកគេជឿថាជាអំពើអយុត្តិធម៌។ កាសែតនេះក៏បានអះអាងផងដែរថា ក្លឹបអេស្ប៉ាញនឹងស្នើសុំឱ្យលោក Pol van Boekel ដែលទទួលខុសត្រូវក្នុងបន្ទប់ VAR ពេលប្រកួតនោះ ឈប់ចូលរួមក្នុងការប្រកួតរបស់ Barcelona ម្តងទៀតឡើយ៕
ប្រភព៖ Sportbible