បណ្ដាអ្នកគាំទ្រហង្សក្រហម Liverpool ចាប់ផ្ដើមនឹករលឹកដល់ខ្សែប្រយុទ្ធ Sadio Mane ហើយ ក្រោយពីឃើញកីឡាកររូបនេះបង្ហាញទម្រង់លេងកាន់តែល្អនៅ Bayern Munich ។
ខ្សែប្រយុទ្ធសេណេហ្គាល់ខាងលើរកបាន១គ្រាប់ឱ្យក្រុម Bayern Munich ក្នុងការប្រកួតដែលពួកគេយកឈ្នះលើក្រុម Vitoria Plzen ក្នុងលទ្ធផល ៥-០។ កីឡាករដែលទើបផ្ទេរទៅលេងនៅអាល្លឺម៉ង់មួយនេះ ទើបតែចូលនៅរដូវកាលដំបូងនេះទេ ប៉ុន្តែគេក៏បានបង្ហាញទម្រង់លេងល្អ និងជួយក្រុមបានច្រើនផងដែរ។ រហូតមកដល់ពេលនេះ មានអ្នកគាំទ្រ Liverpool ជាច្រើនចាប់ផ្ដើមស្ដាយការចាកចេញរបស់គេកាលពីរដូវកាលដោះដូរកីឡាករកន្លងទៅហើយ។
បណ្ដាអ្នកគាំទ្របានសរសេរថា៖ “ស៊ុតស្អាតណាស់ យើងពិតជានឹកគេខ្លាំង។ នេះជាខ្សែប្រយុទ្ធដែល Liverpool កំពុងខ្វះខាត…”។ ខណៈដែលក្រុម Liverpool នៅពេលនេះកំពុងលេងមិនសូវជាល្អនោះទេ ជាពិសេសនៅក្នុងពានរង្វាន់ Premier League ផ្ទាល់តែម្ដង។ រហូតមកដល់ពេលនេះ ពួកគេស្ថិតនៅពាក់កណ្ដាលតារាងឯណោះ។
Mane នារដូវកាលនេះជាមួយក្រុម Bayern Munich គេរកបាន៧គ្រាប់ហើយក្នុងការលេង១៣ប្រកួតកន្លងមក។ ជាមួយគ្នានេះ គេក៏ជាកីឡាករសំខាន់ម្នាក់ដែលតែងតែទទួលបានទំនុកចិត្តពីអ្នកចាត់ការក្រុម Bayern Munich ផងដែរ៕