លោក Antonio Conte បាននិយាយថាកូនក្រុមគួរតែពង្រឹងស្មារតីនិងធ្វើឱ្យបានល្អជាងនេះក្នុងការប្រកួតក្រៅដីទល់ក្រុម Frankfurt ។
ក្រុម Spurs បានធ្វើដំណើរដល់ទឹកដីអាល្លឺម៉ង់ហើយ ដើម្បីត្រៀមខ្លួនប្រកួតជាមួយក្រុម Frankfurt ក្នុងពានរង្វាន់ UEFA Champions League ។ មុនការប្រកួតនោះឈានមកដល់ លោក Conte បានតឿនដល់សមាជិកក្រុមថាត្រូវផ្ដោតអារម្មណ៍ឡើងវិញ ព្រោះតាំងពីរដូវកាលមុន រហូតមកដល់បច្ចុប្បន្ននេះ ក្រុម Spurs លេងក្រៅដីមិនបានល្អនោះទេ។
អ្នកចាត់ការសញ្ជាតិអ៊ីតាលីបាននិយាយថា៖ “រឿងពិត រដូវកាលមុនក្នុងពានរង្វាន់អឺរ៉ុប យើងចាញ់ច្រើនប្រកួតណាស់នៅក្រៅដៃ ហើយរដូវកាលនេះវិញក៏ដូចគ្នា។ យើងចាញ់ Sporting និង Arsenal នៅក្រៅដី…យើងគួរតែធ្វើបានល្អជាងនេះ”។ ក្រុម Spurs និង Frankfurt មាន៣ពិន្ទុឆ្លងកាត់២ប្រកួតកន្លងមកក្នុងពូល D ។ ក្រុមកំពូលតារាង Sporting មាន៦ពិន្ទុពេញ ហើយក្រុមបាតតារាង Marseille វិញ មិនទាន់មានពិន្ទុនៅឡើយទេ៕